أخر كلام

إزاي أعضاء مجلس النواب الموقر يهاجموا حكومتنا الموقرة؛ ومش كدا وبس.. وقال كمان بيطالبوا برحيلها بسبب فشلها الذريع؛ لأنه "كفاية عليها كدا"..؟!!
بذمتكم دا كلام.. حكومة إيه اللى ترحل يانوابنا الأفاضل..؟!
دى الحكومة بينها وبين الشعب عشرة عمر.. وعيش وملح وفراخ وبيض وزيت ولحمة وبنزين وهم مايتلم..وبعد كل دا.. عايزينها تمشي.. ليه هي كانت عملت إيه.. ولا عملت إيه..؟!
دى الميزة الوحيدة فى حكومتنا الرشيدة إنها
ما بتعملش حاجة خالص..!!
 كنت عايز أقول رأيي بمنتهى الصراحة فى بتوع معهد الأغذية اللي بيأكدوا إن لحمة الحمير لذيذة آخر لذاذة.. وأحلى من اللحمة البلدي الطازة..
زيها زي أرجل الفراخ اللي بتحمر الخدود وبتدور الكعوب وبتجوز البنات فشر السكر النبات.. لكن مانعني حاجتين.. أول حاجة: هي الخوف من أن أخدش الحياء العام.. تاني حاجة: إننا فى رمضان وخايف أبوظ صيامى بسببهم..!!
اللهم إني صائم.
 الحكاية "مصخت" قوي، على قولة إخواننا الصعايدة، فى نقابة المهندسين.. ويبدو أن الأزمة بين المؤيدين والمعارضين للنقيب فيها أصبحت أصعب وأعوص من الأزمة الروسية الأوكرانية..
بصراحة.. شكل المهندسين بقى حاجة تكسف خالص..!!
وطالما إن مفيش حد فى بر مصر عايز يتدخل لنزع فتيل هذه الأزمة.. فإننى أدعو دولة الصين الصديقة؛ بعد أن تنتهى من الوساطة لحل الأزمة الروسية الأوكرانية.. أن تتم جميلها وتتوسط لحل الأزمة المشتعلة فى نقابة المهندسين المصرية ..!
ويا خفى الألطاف نجنا مما نخاف..!
 عجيب أمر المجتمع العالمي فقد وصف
وزير المالية الإسرائيلي؛ الذى ينفى وجود الفلسطينيين وينتقص من سيادة الدولة الأردنية، بالعنصرى الأرعن غير المحترم.. وكأنه هو العنصرى الأرعن غير المحترم الوحيد فى الحكومة الصهيونية؛ وباقى وزرائها ملائكة لابسين أبيض فى أبيض وبأجنحة مثنى وثلاث ورباع يدعون للسلام والوئام آناء الليل وأطراف النهار..!!
يا جماعة الخير كلهم "عيلة" من نفس الطينة والعجينة.. هى نفسها "العيلة الواطية النصابة".. اللى قال عليها المطرب حمادة هلال..!!
 أنا عمري ما اتفقت مع أي كلام بيقوله "الملياردير" إياه.. لكننى متفق معه تماما فيما قاله عن برنامج المقالب إياه المقرر علينا فى كل رمضان؛ حيث وصفه بأنه برنامج سخيف وعبيط.. وأزيده من الشعر بيتا فأقول إن مقدمه أسخف.. وبيستظرف ودمه يلطش بلد..!!
مرة تانية : اللهم إني صائم.