كفاية بقى!!

كتبت : هبه هانى ... ياريت كل واحد بيفتى فى البلد دى يسكت، فللأسف المدعين المتأسلمين فاكرين نفسهم ملكوا البلد بعد الاستفتاء المعيب اللى مكنش ليه لازمة أصلا، والانتخابات الملعوب فيها على أساس الجهل بالدين، علشان كده عاوزة أقولهم إحنا مسلمين ومسيحيين متدينيين من آلاف السنين، وصابرين على الفقر والجوع والمرض علشان متمسكين بتعاليم ديننا، حد يقولى ليه المصريين سكتوا كل السنين اللى فاتت؟ أنا أقولكم، لأنهم كانوا ولايزالون يؤمنون بعدل ربنا الحق القوى المنتقم الجبار، استحملوا الفقر والجوع والمرض، ولكنهم لم يستطيعوا تحمل الخيانة والغدر والإهانة وطبعا التكفير، علشان كده بسأل، مين فى دول نبى ولا قديس (استغفر الله) علشان يتكلم باسم الدين أو يعتبر نفسه أحسن مننا؟ أنا زهقت من المكائد والدسائس من أجل الصراع على السلطة، مين بيحب البلد دى بجد يا ناس؟ ياللى بتحبوا بجد البلد دى قوموا وشدوا حيلكم، وامسكوا فى إيد بعضكم ضد الناس اللى عايزين مصلحتهم بس، يلا نوريهم إحنا إيه وهما إيه! نفسى كلنا نكون فعلا إيد واحدة، مسلمين ومسيحيين، نساء ورجال وشباب وأطفال، يلا نقوى مصر بالحق والعلم والعدل، ونجملها بالحب، وختاما يارب اضرب الظالمين بالظالمين واخرجنا منهم منتصرين.