انبسط وابسط غيرك

كتبت : امانى يسرى ... أكيد طبعا مفيش حد مش بيحب الخروج والفسح، ويا سلام بقى لو خروجة حلوة مع اصحاب قريبين أوى مننا وبنحبهم، الواحد بيحس إنه قضى وقتاً جميلاً جداً، ده بالعكس مش بيكون عاوز الوقت ده يخلص، وبيتمنى إنه يتكرر تانى!! علشان كده عندى فكرة جميلة جدا قرأتها على الفيس بوك، وعجبتنى جدا، وأتمنى إن ناس كتيرة تنفذها، إيه رأيكم بعد ما الخروجة اللى خرجناها تخلص، وخلاص نكون مروحين، يا سلام لو كل واحد فينا طلع من جيبه مبلغ كده على قده (حتى لو جنيه واحد أو اتنين جنيه) ولو كان الجروب شوية صغيرين فيبقى تمام أوى لو زودنا المبلغ ل 5 جنيهات، وحطينا المبلغ ده كله فى ظرف ورحنا بيه مثلا على دار للأيتام أو مستشفى، أو اديناه لأى حد غلبان أو ممكن جامع برده، وخليناه صدقة جارية وسميناها صدقة الخروجة ..
الخلاصة اللى عاوزة أوصلها إننا مادام قضينا وقت حلو واستمتعنا، يبقى فيها إيه لو كسبنا ثواب من الخروجة دى، وعملنا حاجة كويسة لآخرتنا برضه؟؟ وهتبقى الفرحة بالوقت الحلو دى فرحتين ...
الفرحة الأولى إننا شوفنا أصحابنا وانبسطنا باللمة الحلوة، والفرحة التانية إننا هنبقى سبباً من الأسباب اللى نسعد بيها ناس محتاجة، هى ممكن تكون حاجة بسيطة بالنسبة لينا، بس كبيرة أوى عند ربنا وطالما ربنا مدينا فلازم نساعد اللى مش معاهم ... و((من فرج هم مسلم فرج الله همه يوم القيامة )).