محدش فاهم حاجة !

«أنا عايزه أفهم حاجة هو إحنا امتى هنتجمع على رأى واحد، وامتى هنعرف إننا كلنا مصريين (لا مسلمين ولا مسيحيين) (لا إخوان ولا سلفيين) (ولا أهلاوية ولا زملكاوية) (لا أبيض ولا أسود) بجد حاجة تضحك كله شايف إن محدش فاهم غيره هو، ولو مكنتش متفق معاه فى الرأى تبقى إنسان مبتفهمش حاجة، و أعملك (remove) من على (face book)، ولو وافقتنى تبقى صاحبى وحبيبى و كفاءة على رأى (اللمبى) نفسى إننا نبقى مع بعض مش ضد بعض، إية المشكلة نختلف إذا كان ربنا خلقنا كل واحد ليه حاجة بتاعته تخصه، مش عشان يحسس غيره إنه مبيفهمش لمجرد إنه مخالف ليه.. ياجماعة بجد إحنا مش عارفين نتكلم مع بعض، وكله كوم وبرامج (المكلمة) كوم تانى، بجد الإخوه الأفاضل بتوع القنوات اللى إحنا عارفين بيخدوا كام، وشغالين فى حب الوطن مزايدات، أحب أقولهم كفاية رغى كتير، وحاولوا تخلونا نبنى، وجهونا معندناش مشكلة، لكن نفضل بقى أصل ده عنده، و ده ليه، وده عليه، يبقى إحنا يلا السلامة، وأنتوا بالملايين من قفانا، وفى الأخر بتحبوا الوطن معلش أنا نسيت.
خلاصة القول عشان مكنش طولت! أنا عايزه أبنى مش عايزة أرغى.. عايزين وزارة تبقى وزارة أفكار وأعمال، يعنى إحنا نفكر وننفذ مع بعض، مش بس نقضيها رغى كفاية بقالنا بنرغى (9شهور) وداخلين فى 10.. يلا نبنى ياجماعة».راندا فتحى