شروط فيس بوك لمرشح الرئاسة

هكذا وضع رواد الفيس بوك شروط مرشح الرئاسة الجديد .
1- مايكونش منوفي.
2- ألا يستخدم بعض المصطلحات مثل محدودى ال...دخل ولا مساس والمرحلة المقبلة وغيرها من العبارات التى تردد على أسماع الشعب أول مايو من كل عام.
3- يسمع كل يوم الصبح اغنية دامت لمين.
4- مايفكرش انه عشان بقى ريس يبقى قائد الثورة.
5- مايقولناش الإخوة والأخوات انا امى ماخلفتش غيرى انا واخواتى.
6- يصدر قرار بمنع عبارة «بناء على تعليمات السيد الرئيس» واللى يقولها يتحاكم فورا.
7- يكون بيتكلم وبيفهم انجليزى من غير مايطرطق ودانه.
8- يكون عارف اننا انتخبناه هو.. مش هو مراته وابنه وجوز خالته.
9- يبقى عنده فيس بوك بس مابيلعبش فارم فيل ويكتبله بوست واحد فى اليوم عشان مايضيعش وقت الشعب.
10-يكون متواضع جداااا... بس مش لدرجة انه يقعد فى خيمه.
11- مراته تاخد لقب سيدة مصر الأخيرة.
12- مايقعدش فى القصر الجمهوري... ياخدله شقه ايجار جديد.
13- ياكل عيش من ابو شلن ويشرب من مية الحنفية.
14- يتفرج كل يوم على قناة الجزيرة.
15- مايكونش عمل اى ضربات جويه ولا أرضية ولا فضائية يذل اهلنا بيها.
16- مايعطلش المرور عشان يروح مشوار عايز يوصل بسرعة يركب طيارة.
17- مايكونش راعى الرياضة والرياضيين ولا الثقافة ولا المثقفين ولا الفن ولا الفنانين ويسيب الناس دى فى حالها.
18- مايضحكش علينا ويروح يفتتح نفس المكان عشرين مرة.
19- يبطل كلمة نشجب وندين.
20- مايكونش بيصلى العيد قبل مايبدأ وتنزل صورته وهو بيصلى فى الاهرام يوم الوقفة بالليل فى الطبعة الاولى.
21- مايكونش من محبى الاستقرار.
22- بمجرد فوزه فى الانتخابات وقبل مايحلف اليمين يشترى كرسى تيفال الاصلى عشان مايلزقش.