تناتيش

* يا ريت الشعب يعمل لمسة وفاء ويلتزم بأخلاق القرية ويحتفل بعيد ميلاد «أخينا» الثالث والثمانين معه فى ليمان طرة وسط أسرته وحبايبه وأصدقائه..
ويا ريت الشعب يتم جميله ويجيب التورتة ويغنى له: «ياللا حالاً بالاً حيوا (أبو الفساد) هايكون عيد ميلاده الليلة أجمل الأعياد.. فليحيا (أبو الفساد)..!!»
* خلاص.. كملت.. الكل شَرَّف فى «طرة ريزورت».. رئيسا مجلسى الشعب والشورى.. وقيادات الحزب الوطنى والحكومة.. مش فاضل غير أنهم يعملوا المؤتمر السنوى للحزب فى اللومان.. تحت شعار «السجن بيتقدم بينا»..!
* أحلى نكتة قالها الأخ صاحب مقولة «الفساد وصل للركب» أنه اشترى الفيلات والشقق والشاليهات بالتقسيط المريح.. يا حلاوة المولد.. مش ناقص غير أنه يقول إنه اشتراهم من مصروف جيبه..!
* عجبتنى قوى فكرة الموقع الذى أطلقه شباب الفيس بوك تحت شعار «لو الكورة هاتفرقنا.. نخرمها ونبقى ارتحنا»..!
إيه رأيكم حتى لو مش هاتفرقنا ماتعالوا نخرمها.. وتريحنا..!
* بالمناسبة.. لعيبة النادى الأهلى يحمدوا ربنا أنهم غلبوا فريق اتحاد الشرطة اتنين واحد فى عهد وزير الداخلية الحالى منصور العيسوى، لأنهم لو كانوا عملوها أيام الوزير الأسبق.. كان زمانهم بيتنفخوا دلوقت على 28..!!
* خالد عليش: تذكروا هذا الاسم جيداً؛ لأنه صاروخ الكوميديا القادم فى مصر..!
* أضم صوتى لصوت المستشار أحمد الزند رئيس نادى القضاة بأن يقوم ثوار التحرير بعمل مليونية لدعم الاقتصاد المصرى.. فكل المؤشرات تؤكد أن اقتصادنا إذا استمر هكذا فى ظل توقف الإنتاج وتراجع أعداد السياح.. فسوف يذهب وراء الشمس، وفى رواية أخرى هايروح فى طوكر..!!
* بعد أن أعلنت الست إيناس الدغيدى المتخصصة فى أفلام الجنس والدعارة أنها تقوم حالياً بالإعداد لإخراج فيلم عن «زنا المحارم»؛ فإننا لا نملك إلا أن ندعو خفى الألطاف أن ينجينا مما نخاف.. يارب استر على البلد..!
وبعدين يا ست إيناس ماترحمى الناس.. فالرحمة حلوة برضه.. لأنها بصراحة مش ناقصاكى خالص..!
* كلمة ورد غطاها:
* شفت النكتة..؟! قال إيه الشرطة البريطانية عملت محضر لجنين لم يولد بعد..!
** واضح إن الشرطة البريطانية عاملة زى الفاضى اللى بيعمل قاضى.. ياريت يخطفوا رجليهم لزيارة قسم الخليفة علشان يتعرفوا على الأخ سلومة الأقرع.. وأبوسنجة.. وشافطورة.. وبعدها هايعرفوا إن الله حق..!