آخر كلام !!

* يا جماعة اتقوا الله فى مصر.. فمصر ليست جمهورية من جمهوريات الموز، ولا هى دولة كرتونية.. وهى ليست تونس وبالتأكيد ليست أفغانستان علشان نستورد لها رئيس من بره بتقفيلة بلاده، طبقاً للمواصفات الأمريكية على غرار الأخ حميد كرازاى..!
أنا شايف إن أولادنا الشرفاء الأطهار.. اللى صنعوا ثورة 25 يناير بدمائهم، يدوا فرصة لعقلاء هذا البلد وللجنة الدستور والحكومة لتنفيذ أجندة الإصلاحات التى تمت الاستجابة لها..!
وطبعاًالشباب هايسألوا.. طيب وإيه الضمانات
يا باشمهندس..!
أقول لهم الضمان هو الشعار اللى رافعه عشرات الشباب على مختلف المواقع على الإنترنت دلوقت: الشباب الطاهر موجود.. والفيس بوك موجود.. وقبلهم وبعدهم.. ميدان التحرير برضه لسه موجود..!!
* سبحان مغير الأحوال..!! بعض الكُتّاب ورؤساء التحرير حولوا البوصلة وانقلبت مواقفهم 180 درجة ما بين ليلة وضحاها..! كانوا مع الحزب الوطنى وقيادات الحزب الوطنى.. وكانوا يقولون «آمين» على كل ما يفعلونه.. الآن أصبحوا يهاجمونهم أشد من المعارضة..! كانوا ضد «الجماعة المحظورة» أصبحوا الآن يشيدون بها باعتبارها «الجماعة المحظوظة».. كانوا يؤيدون كل ما أسفرت عنه انتخابات مجلس الشعب والشورى ويعتبرونها انتخابات شريفة نزيهة عفيفة.. أصبحوا الآن يهاجمون التزوير الذى تم فيها عينى عينك.. ويطالبون بقطع يد كل من شارك فى تزوير وتزييف إرادة الناخبين..!!
بصراحة هذه المواقف ليست مواقف ترتكز على نظريات سياسية محترمة.. تحترم عقول الناس.. لكنها مواقف ترتكز على نظرية «الشراب المقلوب» اللى بيتلبس على الوشين.. ونظرية ابرة «وابور الجاز» المعجزة اللى اخترعوها فى الستينات.. كانت بتولع من ناحية وبتسلك من الناحية الثانية.. اتنين فى واحد.. يعنى كده تسليك.. وكده توليع.. لامؤاخذة..!!
* بالمناسبة.. هناك كُتّاب محترمون.. احترموا أنفسهم وقارئهم ولم يغيروا البوصلة.. ولم يقفزوا من المركب مع أول موجة..!
* هَمْ يبَكى.. وهَمْ يفَرَّح..!!
شبابنا فى ميدان التحرير دفعوا دم قلبهم فاتورة للإصلاح وتعديل الدستور حتى يليق بمصر صاحبة حضارة السبعتلاف سنة.. وفى البرازيل.. البنات والصبيان عاملين مظاهرات بالمايوهات فى الشوارع مطالبين بتعديل الدستور لتصبح السعادة، أى والله السعادة، حق لكل برازيلى..!
تقول إيه..؟! أخويا هايص.. وأنا لايص..!
* كلمة ورد غطاها:
* شفت الولد والبنت اللى حبوا بعض وهم معتصمين فى ميدان التحرير.. واتجوزوا على سُنّة الله ورسوله أمام آلاف المعتصمين فى ميدان التحرير..؟!
** شفت يا سيدى.. ربنا يستر ومايحتفلوش بسبوع «ولى العهد» وهما لسه معتصمين فى ميدان التحرير..!!