آخر كلام !!

* قيام مصر بتعرية الانتهاكات الأمريكية لحقوق الإنسان دولياً هو ضربة معلم بصحيح.. فهو ده الشغل اللى على أصوله.. فلا يفل الحديد إلا الحديد، فاللى «بيته الأبيض» من قزاز مايحدفش العالم التالت بالطوب..!
* واللى يحرق الدم إن انتهاكات حقوق الإنسان فى العالم كله ارتبطت بأكذوبة تصدير الديمقراطية الأمريكية..!
فأمريكا تصدر للعالم، الثالث بالذات، الديمقراطية والحرية حسب الطلب.. فهناك ديمقراطية تحت الرُكبة وهناك فوق الرُكبة.. وهناك حرية بالكبسة أم لحمة ضانى زى اللى موجودة فى الخليج.. وديمقراطية بالملوخية أم تقلية زى اللى موجودة فى العراق..!
أما الديمقراطية فى أفغانستان فتاكل صوابعك وراها؛ لأنها ديمقراطية بالمهلبية..!!
* برافو رشيد محمد رشيد وزير التجارة، فبعد الرز منع تصدير السكر حتى تنخفض الأسعار.. فاللى يحتاجه البيت يحرم على الجامع.. قصدى التصدير.. لامؤاخذة..!!
* إذا كان الممثل يوسف شعبان بيدور على ممثلة لتمثيل دور الشيماء شقيقة الرسول صلى الله عليه وسلم تكون بريئة وطيبة وبنت حلال وفوق مستوى الشبهات.. فمن الواضح أنه بيدور على إبرة فى كومة قش..!
* بعد إفلات الأهلى من الهزيمة وتعادله بالعافية مع الجونة، أيوه الجونة، وبعد فوز الزمالك على الإسماعيلى بالتلاتة، وتصدره جدول الدورى العام.. أستطيع الآن أن أؤكد وبملء الفم إن اللى هاياخد الدورى السنة دى عن جدارة هو: الأهلى..!!
هى عادتهم ولّلا هايشتروها..؟!
* بيغيظنى ويحرق دم اللى خلّفونى البنى آدم اللى بيستنطع على عساكر المرور وأمناء الشرطة ويقول بكل بجاحة: أنا هاأوريك انت مش عارفنى أنا ابن مين..؟!
وفى آخرة المتمة.. يطلع بسلامته ابن رئيس مباحث.. مراجيح مولد النبى..!!
* مسئولو وزارة الإسكان بيؤكدوا لنا وهم يكادون يحلفون بأغلظ الإيمان أن معاناة الناس مع الطريق الدائرى ستنتهى تماماً مع نهاية العام الحالى.. وكل شىء سيصبح عال العال يا عبد المتعال..!
نقول إيه..؟! أفلحوا إن صدقوا..!
* كلمة ورد غطاها:
* شفت الست اللى مسكوها فى منطقة الزيتون متجوزة 5 رجالة حتة واحدة وكلهم بعقود رسمية..؟!!
** شفت يا سيدى.. منها لله اللى ماتتسمى.. الحاجة «زُهرة»..!!