مدونة

إحنا حلوين قوي في الضحك والفرفشة، وهات يا نكت!! السياسة عندنا نكت.. الحرب نكت.. السلام نكت.. الكوارث نكت.. الحب نكت.. الفرح نكت..
طب بالله عليكم كم نكتة انقالت علي زلزال اكتوبر 1991؟ سمعناش نكتة أمريكية علي إعصار ريتا أو كاترينا؟ طيب نكتة من شرق أو غرب عن حرب العراق أو أفغانتسان.. ياااه افتكرت كان فيه نكتة عن حرب أفغانستان أكيد فاكرينها!! الطائرات الأمريكية كانت بترمي مواد غذائية للشعب الأفغاني م الجو، واحد مسك فرخة مشوية منها وبص للطيارات وقال: من غير كاتشب يا كفرة.
بس برضه النكتة دي مصرية وكانت منشورة كرسم كاريكاتيري لرسام مبدع تحركه عقلية كاتب ساخر عملاق.. إيه حكاية الشعب اللي فاتحها ع البحري نكت ده؟؟ اللي ما يعرفناش يقول إننا أروق شعب في العالم ليست لدينا أية مشكلة علي الإطلاق.. المواصلات راااايقه، والخبز حسب المواصفات القياسية العالمية وفيه شعوب تانية من حوالينا مش لاقياه حتي لو بالمسامير..
مستكترين علينا الضحكة؟ نضحك.. ويلا بينا نضحك.. نضحك علي المستوي الرائع الذي وصلنا له في الكورة بس أخخخخخ... لولال فضيحة الزيرو!! ولولا خروجنا من تصفيات كأس العالم.. يلا نشوف حاجة تانية نضحك عليها بقي.
محدش فيكو يا جامعة عارف الحكومة هتجيبلنا فول رمضان من فين السنة دي؟ م الصين؟ لا.. فيه إشاعة قوية بتقول إن الصين يا تبعت لنا الفول يا الفاوانيس.. وفيه وحدة حبيبتنا هنا بتموت في حاة اسمها الفوانيس علشان كدة منقدرش نلزعلها ونجيب الفوانيس وبلاش فول.. فيه حاجات تانية كتير تفطس م الضحك.. ضحكونا معاكم.. إللي عنده حاجة ما يبخلش بيها علينا.. اتفضلوا