نفسي اعرف فين أم البطة السوده.. اللي جابت 70 مليون مواطن مصري.. بطه دي ولا أرنبة؟؟. تجيب 70 مليون وتوصمهم بالعار طول عمرهم.. يبقوا ولاد بطه سوده.. لا طايلين حقهم في الدنيا ولا في الآخرة.. متعلقة في رقبتنا..تكاكي زي ماتكاكي.. وتجيب عيال.. ومصر تزيد من ولاد البطه السوده اكوام اكوام.. منها لله.. ومنه لله البط الشركسي اللي عمال يلعب معاها وهيه تجيب الزغاليل الي مالووو البلد هتقولي ايه جاب سيرة البطه دلوقتي.. هقولك اني قررت انزل من بيتنا بعد غياب طويل عن الشارع.. وياريتني مانزلت.. فكرت الاول اركب العربية.. والحمد لله لسه طالع من عند باب البيت وقفني عسكري مرور ابن حلال وقالي رخصك.. يهديك يرضيك مفيش... بسأله مخالفتي ايه يابن الحلال قالي سرعة؟؟ قلتله هوه فيه رادار قدام باب بيتنا؟؟ قالي لا.. بالنظر.. طبعا شخص زي ده مينفعش ترد عليه.. وانت شايفه كل شوية يعمل سلامات اشكال والوان لعربيات ماشية مفيمة الازاز كله.. وبيعدو طبعا.. رجعت البيت وسبيت العربية وقلت والله اقضيها مواصلات اكرم.. ركبت التاكسي لقيته بيقولي البنديره بقت الضعف.. قلت يافتاح ياعليم.. خير ياعم الحج؟؟ قالي البنزين يابيه.. قلتله احمد بيه نظيف.. بيقول الزيادة هتبقي خمسة فالمية بس.. قالي طب انزل وخلي البيه بتاعك يبقي ياخدك في التاكسي بتاعه.. قلتله خلاص.. خليها علينا.. وطبعا طول السكة بنتكلم في البنزين اللي غلي علي الغلابة.. والبشوات اللي بيغلوه وهمه مش حاسيين بحاجه.. كل واحد فيهم راكب عربية الحكومة والبنزين علي الشعب.. ليه بقي.. علشان احنا ولاد البطة السوده اللي مش عارف هيه فين لحد دلوقتي.. ياجماعة يابتوع تنظيم الاسرة.. ياماما كريمة.. ياعيادات النجمة الذهبية.. بالله عليكم.. دوروا علي البطه السوده دي وخلصوا البلد منها.. زهقنا من البط الاسود اللي جايبنا لورا.. بانتظار البط الابيض.. والوز توقيع: مصرنا المدونة علي مسئولية صاحبها.
