كفاية بقى!

الناس جرى لها إيه..؟! معقولة الناس عاوزة تدبح بعض وتخلص على بعض علشان شوية تحرش بتلات تعريفة لا بيقدموا ولا بيأخروا..؟!
هو فيه إيه..؟! والناس ضميرها ودينها واخلاقياتها راحت فين..؟!
هو الشعب ده اللى هايجننى فاكر إن التحرش شاب بيعاكس فتاة وبس وربما تكون الفتاة معجبة بالمعاكسات..!! ده حتى العيال اللى قبضوا عليها بتتحرش بالبنات ياحول الله الواحد فيهم عامل زى الفتلة لو منعت عنه العشا ليلة يتحول إلى أعجوبة من أعاجيب الزمان ومومية متحركة وسط الكائنات..!!
والأعجب من كده الناس المتطوعة من المدنيين لمنع التحرش..!! والله العظيم ويمين يحاسبنى عليه ربنا يعلموا العفة والشرف ويخلوا الواحد يكره أم النسوان!.
بس اللى أنا عاوز أعرفه وواحد يفهمنى.. هو التحرش فى الجنس فقط وما فيش تحرش تانى يعطى الإنسان نفس الإحساس بالغضب والألم لدرجة أنه يكره نفسه؟!.
طبعاً.. دى حياتنا للأسف كلها تحرش من ساعة ما تقوم من النوم لحد ما الواحد ينخمد..!!
بذمتكم مش التحرش الجنسى أهون من تحرش الجماهير ببعضها نتيجة الزحام الشديد فى القاهرة! البعض يتحدث عن التحرش الجنسى ونسى أن هناك تحرش علنى فى المرور والهيئات الحكومية الخاصة بخدمة المواطنين..!!
اليس ما يحدث أمام أفران العيش البلدى هو التحرش بعينه وعلى عينك يا تاجر..!!
اليس التحرش ارتفاع فواتير الكهرباء التى تنقطع كل شوية وفواتير المياه الملوثة التى نشربها..! وخد عندك بقى تحرش من التصريحات التى يطلقها بعض الذين يعتبرون أنفسهم أوصياء على رئيس الجمهورية والوزراء ويتحدثون بأسمهم ويسيئون إليهم بحجة أنهم ضمن الفصيل الذى يحكم مصر الآن..!!
يا عالم يا هوو حرام عليكم بقى الشعب الغلبان ده اللى بيسأل الله فى حق النشوء.. كفاية تحرش وكل واحد يشوف شغله بما يرد الله ويسيب الناس تشتغل وارحموا أنفسكم من كل أنواع التحرشات..!!
يعنى بالبلدى كده.. انكسفوا على دمكم وكفاية نصب.. حتى المتحرش بالنسوان نصاب لأنه يعاكسها بألفاظ وكلمات ليست فيها..!!
زى ما واحد بيعاكس وكده وبيقولها أكيد مامى نحلة علشان تجيب العسل ده كله وعلى رأى شاعر المسخرة اللى شعره بيجيب ورا.. حينما يقول:
واللاتى والعزة إنك لموزه.. وهى شكلها يفوق خمارة..!!
فتكم بالعافية