قهوة زيادة

كل منا له مزاجا خاصا يتمثل في فنجان القهوة فمنا من يحبها مضبوطة ومنا يحبها زيادة وهناك من يتحملها سادة ، فنجان القهوة ذا الوش المضبوط كفيلة أن تغير مجرى يومك بالكامل .. ولكن هل أمعنت النظر في حياتك هل هي مضبوطة كفنجان قهوتك أم أن حياتك "من غير وش".
الغريب أن هناك اناس كثيرة تعيش حياتها كلها "سادة" ولم تحاول ان تضع ملعقة سكر تخفف المرارة التى في حياتها .. طب اخدت بالك ايه ناقص فى حياتك علشان العيشة تحلو .. طب هتفضل تشربها سادة وباصص لفنجان غيرك .. طب هتفضل قافل على كيس السكر كثير ومستخسر تفتحه ؟
هموم الحياة كثيرة فعلا والهم والضغط الذي نعيش به كفيل بسد النفس لعشرين سنه عن القهوة خالص بس أنت لسه بتشرب قهوة ..صح .. طب اشربها بقي على مزاجك ، اضبط فنجان قهوتك واضبط معاه حياتك ، دور إيه اللي ناقص في حياتك وحاول تكمله صدقني ملعقة سكر ممكن تحلي فنجان قهوة وهتبقي مبسوط وأنت بتشربه .
لو بصيت في جيوبك ولقتها منفضة .. الضحكة ببلاش ..
لو أنت حاسس بوحدة ..أكيد حواليك لمة حلوة بس انت بتقول عليهم مزعجين
لو مبتحبش شغلك ومخنوق فيه .. بص كويس هتلاقيك طلعت بصديق صالح يخفف عليك الخنقه اهلك عقدة حياتك وشايفنك فاشل ..بس طول الوقت واقفين جمبك ..أنكر بقي لو علاقتكم الزوجية على وشك الانهيار .. يا تسبها تنهار وتخلص من وجع الدماغ يا دور على أصل المشكلة وتحلها المهم تكون راضي عن حياتك .
الخلاصة قبل ما القهوة تفور بلاش تستسلم وتسيب حياتك مُرة .. جاهد علشان تغير حياتك للاحلي علشان أنت تستحق تعيش حياة حلوة مفهاش مرارة .. استمتع بقهوتك ولا تسمح لأي ظرف ان يعكر "وش قهوتك" .
تبرد قهوتك إذا غفلت عنها وتصبح بلا طعم فما بالك بحياتك ..استمتعوا بقهوتكم قبل فوات الأوان .