"زغرطي يالي انتي مش غرمانة"

بيقولك "طلعنا من المولد بلا حمص" فيه حد هيقولي يا عم إيه جو الحمص والفشار، والموالد اللي هتصدعنا بيه ده من الأول؟ أقول لك يا "خال" بس طول بالك عليا حبتين.
هي الحدوته لما كنت في بلدنا الصغيرة، آخر مرة لاحظت إن فيه كام مولد كده عمران، والدنيا هايصة، والبلد مقلوبة.
سئلت أية الحكاية يا جدعان ؟ قالولي دة مولد "سيدك البرلمان" قولت، وماله، يبقي فيه حمص كتير والمولدجية "هيسقسقوا"، وفيه ناس هتتعشى ضروري.
وعرفت كمان إن فيه كام مرشح عندنا وأحلى حاجة إنهم ناس طيبين بيترشحوا بس علشان يسقطوا بعضيهم، وبيعكروا، وحد تاني منعرفوش، هو إللي بيصطاد!
أنا طبعا مش هتكلم على حد فيهم علشان هما ناس أحسن مني أنا على الأقل؛ وبعدين بيني، وبينك، ومتقولش لحد، هي حكاية الانتخابات دي رزق، وحمص ربك بيكرم فيه نوعية من "المولدجية "اللي" متعودين يروحوا المولد.
ومحدش يجرجرني في الكلام علشان المولد ده مش محتاج رغي كتير هو أنا صعبان على بس الفلوس اللي هتتصرف من الدولة على الانتخابات، سيبك من اللي هيصرفوه المرشحين لأنهم عارفين هيلموه تاني أزاي.
وهو يعني هيحصل إيه لو الانتخابات أتأجلت كمان سنة ولا إتنين لغاية البلد متقف على حيلها؟ وعلشان الغلابة في آخر المولد تلاقي حمص. ما علينا وخلينا في المولد التاني.
وأنا ماشي في الطريق، لقيت زينة وفرح ، كده فقولت خير ربنا يفرح الجميع والجواز سترة برضوا وميجراش أي حاجة يعني.
ما هو موسم العيد الكبير والصغير بتلاقي الأفراح، والليالي الملاح زى ضرب النار عندنا في البلد.
لغاية كده كله تمام وألف مبروك وعقبال البكاري ،ولكن المصيبة إن في بلدنا العيال بتتجوز عيال.
تبقى العيلة يا دوب هيبدأ خراط البنات يخرط فيها، والمشكلة انه مبيلحقش أصلا يخرط كام خرطه على بعضيهم، ولا تعرف حاجة عن الجواز ولا سنينة.
وتيجي أمها مسكينة، متنامش لحد متجيب "واحد على "بوز"أبوه، وأمه إلي هو أصلا يادوب شنبه خط في وشه، ومرحش حتة ولا يعرف حاجة في أي حاجة.
وأقولك على سر علشان لو حد عجبه الحال، وحب يتجوز من بلدنا.
شوف يا خال أول يومين "مقولكش" بط وفراخ ولحمة وفاكهة والصواني رايحة وجيه، والزغاريط قالبة الدنيا.
الكلام دة ممكن ياخد بالكثير شهرين، وتبتدي الحكاية، أبو العريس المسكين، كان عاوز يفرح ويجوز سبع البرمبة اللي لسه معرفش يجيب جنيه من بره. يروح يداين ويجيب شبكة وربكة وعفش وما أدراك ما العفش وكده المولد خلاص فض وزغرطي يالي انتى مش غرمانة.
يقوم أيه أبو العريس يقولك عاوزين نسدد، وهو أصلا متفق مع حد تاني أنه هيبيع الذهب بعد المولد مينفض وزغرطي ياللي انتى مش غرمانة.
اللي يوم ما اشتروه عملوا زفة في الصاغة وفيه هبل أصلا مش عارفين إن العيلة مش هتلبس الذهب أسبوعين على بعضيهم، علشان لو متبعش، آمها هتقول لها خبيهم، وأوعى حد يلمسهم غيرك.
وتتقلب الجوازة لمناحة، وفي الحالة دي أهل العيلة بيعترضوا و مبيكملوش خمس شهور.
بتكون "العيلة" حامل تقوم رايحه عند أهلها، ويشتكوا "العيل" بالقايمة والنايمة على جنبها، والنفقة وغيرها واللي من بلدنا حافظ الكلام ده صم.
ويجي بعد كده المتعلمين يقولوا لك إيه السبب في حالات الطلاق الكتير دي في بلدنا؟، أقولك يا خال الموالد عندنا بقت منهج وأسلوب حياة، وتطلع من مولد تدخل في التاني، وفي كل مولد ناس بتحيي وتزغرط علشان مش غرمانة حاجة.
طيب هو إيه اللي هيحصل لو علمنا "العيال" يعني إيه جواز وفي نفس ذات الوقت أتأكدنا إن "العيل" راجل وممكن يعيش مستقل عن أي حدوممكن يطلعوا من المولد بآي نوع من الحمص.
وللأسف أي مولد في بلدنا بيخلص وينفض والغلابة اللي أصلا المولد معمول علشانهم ما بيشوفوش الحمص.
وزغرطي يالي انتي مش غرمانة.
"وأهو مولد والسلام".