من مذكرات ثائر فى التحرير .. إسمه محمود يوسف

الثائر محمود يوسف
يكفيك لحظة واحدة تحس فيها باحترامك لنفسك , و إنك مش جبان و مش منافق. يكفيك إنك بتدافع عن
ناس بتحبهم و إنت عارف إنهم أول ناس بيسخروا منك و بيعتبروك خاين أو في أفضل الأحوال أهبل. يكفيك
لحظة تكون فيها شريف , ناسي نفسك و احتياجاتك في سبيل المبادئ اللي إنت مؤمن بيها. يكفيك لحظة
تحس فيها إن إنت حر , ماشي فاتح صدرك و مش فارقة معاك تموت طالما هتموت واقف.
لو كان للثورة دي حذاء , أنا كنت قبلته , من كتر فضل...ها عليا. الفارق بين اللي شاركوا و بيشاركوا في
الثورة , و بين اللي بيلعنوها , مش فارق وطنية , أبدا , مش كل اللي ضد الثورة خونة و عملاء , فى كتير
مش شايفين الحقيقه و اكتر منهم معندهمش الشجاعه الكافيه انهم يشوفوها مع انها واضحه قدام عنيهم .
اللي عنده الشجاعة و عايز يحس بالشرف زى ما بيقولوا بالانجليزى honor , شارك و بيشارك في
الثورة.
و اللي ماعندهوش.. بيدور على تبريرات لعدم المشاركة , و تبريرات جديدة للعن المشاركين. ياااااه يا بلد
أمرك في إيد زبالتك , و سلاحك في إيد زبالتك , و خيرك في إيد زبالتك , والشرفاء فيكي اللي ما اتدفنش
في قبر , اندفن في زنزانة , و اللي ما خسرش حياته , خسر حريته أو عينيه , أو حد غالي عنده.
أنا مش هالوم حد , الجدع جدع و الجبان جبان.