الألتراس ردًا على عقوبات الجبلاية: فاض بنا الكيل.. وزمن العقل انتهى

أصدرت صفحة ألتراس أهلاوى على موقع التواصل الاجتماعى "فيس بوك" بيانًا حول موقف الرابطة من عقوبات اتحاد المصرى حول ومذبحة بورسعيد التى راح ضحيتها عشرات القتلى ومئات المصابين.
وجاء نص البيان كالتالى:
بسم الله الرحمن الرحيم
إذا كان سكوتنا خلى الناس تفتكر انه ضعف يبقى شيطان خايب ولعب بعقولكم وكلامنا موجه لكل واحد افتكر أنه هيقدر يموت القضية أو يغير مسارها من حكومة لا تعرف إلا عقلية النظام البائد فى حل المشاكل بأسلوب المتخلفين عقلياً، أو إعلام قذر لا يعرف إلا أسلوب الدعارة الإعلامية، أو قاتل فاجر قتل ودبح وطلع النهاردة يطالب بكل بجاحة بحقوق.
فات 52 يوم وإحنا بنطالب بالحق العادل ولا كسرنا ولا خربنا وقولنا فى ناس محترمة لسا عندها ضمير ممكن تريح قلوب أمهات الشهداء وقلوبنا بأبسط الحقوق التى لم ولن تعوض عن خسارة أبنائهم وأخواتنا ولكن واضح أن الصوت العالى هو اللى ليه الغلبة فى البلد وأنى لما أنزل واكسر واقطع طريق يتعملى حساب ودة مكنش هدفنا ولا فكرنا عشان إحنا لينا حق وبنخاف ع البلد وعلى مصلحتها ولكن بعد القرارات الهزيلة الظالمة التى صدرت من اتحاد الفساد ومن مجلس الوزراء اللى وعد نواب القتلة بالحفاظ على النادى المصرى على حساب دم 74 شهيدا.
بس من النهاردة مفيش عقل قولوا علينا بلطجية مدمنين عملاء مجانين إحنا أى حاجة ممكن تقولها بس إحنا هنبقى مجانين عشان الحق يرجع بالقانون أو بدراعنا ولكم حرية الاختيار.
إحنا أصحاب حق وأصحاب القضية وشوفنا الموت بجانب الشهداء وعندنا استعداد نموت عشان الحق يرجع وإذا كان اللى ماتوا 74 ممكن فى أى وقت العدد يتضاعف.. وبناءً عليه:
1 - نطالب بمحاكمة خاصة وعاجلة لكل من شارك فى الجريمة سواء دبر لها أو شارك فيها أو نفذها مهما كان منصبه أو سلطته وألا نختذل المتهمين فى المقبوض عليهم فنحن لا نستطيع تكذيب أعيننا التى رأت الآلاف فى الملعب تشارك فى المذبحة أما بالقتل أو الشروع فيه أو حتى المشاهدة والتصوير والذى يندرج تحت بند التستر على الجريمة.
2- هبوط النادى المصرى وتجميد جميع الأنشطة الرياضية لمدة ثلاث سنوات وفى حالة خروج أى فريق للنادى المصرى فى أى درجة أو مرحلة سنية خارج المدينة لا يلوم أحد إلا نفسه.
3- عدم عودة النشاط الرياضى بالنسبة للدرجة الأولى الممتاز لحين استرجاع حق الشهداء بالكامل، وليس لنا أى علاقة بباقى مسابقات الدورى فى الدرجات الأدنى.
لذلك قررنا التواجد أمام اتحاد الكرة الفاسد الجبان الذى تملى عليه القرارات من جهات أعلى شاركت فى المجزرة بحجة اللوائح والقوانين الذى أصدر القرارات الهزيلة فقررنا إيقاف أى نشاط لاتحاد الكرة حتى صدور أحكام القصاص والقرارات العادلة لذلك سيبدأ الاعتصام أمام اتحاد الكرة يوم الأحد الموافق 26/3/2012 الساعة 11 صباحاً.
وعلى جميع أهالى الشهداء وأفراد المجموعة واولتراس ديفلز وجمهور الأهلى وأحرار مصر وكل من له حق الاستعداد للتواجد والاعتصام حتى يتم تنفيذ المطالب.
البيان هدية مننا للإعلام كمادة خصبة للحديث عنه وحشو البرامج فى الأيام القادمة وزى ما اتعودنا منكم هتقولوا مين دول عشان يهددوا أو يتكلموا بالطريقة ديه زى أسلوبكم المعتاد لإرضاء الحاكم وهتقولوا بلطجية ومخربين بس إحنا القشة اللى هتقطم ضهر الفساد.
ومن يريد التصدى لغضب الأولتراس وأصحاب الحق وأهالى الشهداء من جهات عليا نعتبرها شركاء فى الجريمة نتمنى وجودكم أمامنا والعاقبة على من ابتدى.. الحق راجع لأصحابه لا محالة.