"عارفة اني هتهاجم".. منة فضالي توجه رسالة ل محمد سامي

وجهت الفنانة منة فضالي، رسالة للمخرج محمد سامي بعد قرار اعتزاله الإخراج التليفزيوني.
ونشرت منة فضالي، صورة لها معه، عبر حسابها على إنستجرام، وعلقت: "محمد سامي أنت صاحبي وأخويا غير انك مخرج شاطر بجد وعملت أعمال كتير جدا ناجحة .. ربنا يكتبلك الخير والنجاح دايما في خطواتك اللي جاية وأنا سعيدة بجد اني كنت معاك في كذا عمل ليك ودايما بطلع غير كل سنة".
وأضافت: "أنا بحبك جدا على المستوى الشخصي لأننا عشرة، عارفة اني هتشتم وهتهاجم بعد البوست ده بس أنا متعودة
لأن دايما الناجح بيتحارب.. بحبك يا سمسم".
وكان المخرج محمد سامي، كتب عبر حسابه على فيسبوك: "وداعا الدراما التلفزيونية السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي 15 سنة، قدمت فيهم كل اللي قدرت عليه لإسعاد الجمهور العربي ، وحققت بفضل ربنا نجاحات مع نجوم كتير و مع شركات وقنوات كلها مهم".
واستكمل: "دايما الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التلفزيوني، لكن كنت بنتهي من التزامات موقعة مع شركات ونجوم، والحمد لله انتهيت منها وكان آخرها 2025، معنديش حاجة أكتر أقدر أقدمها في التلفزيون".
وتابع: "خايف من تشبع الجمهور من أسلوبي ومن الوقوع في فخ التكرار ودائرة المتوقع والملل، والوحيد القادر على الدوام هو الله وحده، الحمد لله أخر عملين ليا "إش إش" و"سيد الناس" حققوا نجاح أنا سعيد بيه".
وأضاف: "كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقي إستحسان الجمهور أو إعجابهم في الأخر الفنان دايما بيجرب و الفنون جنون زي ما بيقولوا".
واختتم : "إدعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان وأجلتها كتير لحد مالقيت نفسي بكبر وخايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجه بيحبها عشان يعمل حاجة تانية بيحبها برضه و عايز يجربها بس محتاج عيلة تسانده علي اتخاذ قراره، كل التوفيق لكل زمايلي و بحبكم و بشكركم علي سنين المنافسة الجميلة اللي عملت أسمائنا كلنا وأتمني لنفسي التوفيق في الخطوة الجديدة".