أول تعليق من إيناس عز الدين بعد انتقاد تصريحاتها الأخيرة عن والدتها

علقت المطربة إيناس عز الدين، على الانتقادات التي تعرضت لها بعد تصريحاتها الأخيرة عن والدتها، وذلك خلال لقائها ببرنامج "أوضة ضلمة".
وظهرت إيناس، في فيديو نشرته عبر حسابها الخاص بموقع "إنستجرام"، وقالت خلاله: "في الحقيقة عندي كلام كتير عايزة أقوله مش كله ينفع يتقال بس خلوني أقولكم لو أنتوا مش مكان حد ومعيشتوش نفس تفاصيل حياته ومشفتوش اللي هو شايفه متحكموش".
وتابعت: "أسهل حاجة لما بنشوف حاجة بنحكم عليها من برا، شفنا حد بيقول إنه عاش ظروف صعبة فنحكم عليه ونبدأ بقى نطلق أحكام شمال ويمين على حسب أهوائنا وعلى حسب أفكارنا وعلى حسب الظروف اللي إحنا عيشنا بيها ف إحنا بنحكم على الدنيا كلها منها، انتم مشفتوش اللي غيركم شافه، ومعيشتوش اللي غيركم عاشه، ذكرياتكم مش نفس ذكريات غيركم، والنار مش في إيديكم انتوا، متحكمش على تصرف غيرك إلا لو عشت ظروفه وحياته، ومطلبش من بني آدم مدبوح ميقولش آه".
واستكملت: "وكله فتح أحكام محدش اتكلم على الأهالي اللي بتخلف وبترمي وغيرها يربي، محدش اتكلم إن فيه أهالي متستحقش إن يبقى عندها ضنا، وفيه ناس معتقدة إن لما حد بيتكلم عن عقوق الأبناء عشان مثلًا ظروفهم صعبة ومصرفوش عليهم كويس، محدش فيكم متخيل إن فيه أب بيتحرش ببناته وبيغتصبهم، محدش متخيل إن فيه أم تغار من بنتها وبتعملها أعمال كمان وفيه كتير أوي الدنيا فيها خير وشر".
واختتمت: "انتوا بس بتستغربوا إن حد خرج من الصدمات دي كلها وناجح وصلب عقلكم مش بيستوعب إن ممكن فعًلا يكون كلامه حقيقي، فدي بقى رحمة ربنا علينا، وأسوأ أنواع الانتظار أنك تستنى اعتذار من أقرب حد لينا في الدنيا ولكن مش بشوفها بشوف نظرة جبروت، وأسوأ أنواع الآباء هم النرجسيين، ولو روحت لدكتور نفسي عشان أتعافى مش هيخليني أفقد الذاكرة وانسى كل ذكرياتي وأنا بتضرب وأنا بتعذب ولا وأنا مربوطة في الكرسي يومين لحد ما رجلي كان هيحصلها غرغرينا ولا راسي اللي كانت مخرومة".
كانت المطربة إيناس عز الدين انهارت من البكاء بسبب كشف سر عن والدتها رفضت الإجابة عنه احتراما لذكرى جدتها التي رحلت مؤخرًا، وذلك خلال برنامج "أوضة ضلمة" على قناة "هي".
وقالت المطربة إيناس عز الدين: إكرامًا لأمي اللي ربتني وتعبت فيا مش هقدر أجاوب، إكرامًا ليها"، وذلك ردًا على سؤال: "الست اللي خطفت خطيب بنتها واتجوزته، وحكيتي عنها على صفحتك، كنتي تقصدي بيها والدتك؟"، مضيفة: "أنا آسفة وبعتذر عن الإجابة".
وأضافت إيناس عز الدين، خلال البرنامج المعروض على قناة "هي": "والدي توفي وأنا عندي 5 سنين، ووالدتي موجودة، لكن بالنسبة لي أمي الحقيقية هي جدتي، لأن الأم هي اللي بتربي، اللي بتتعب وبتضحي وبتبدي ولادها عن نفسها وتعيش تحت رجليهم".
وتابعت: "جدتي كانت كل حاجة بالنسبة لي، أمي وروحي، طفولتي كانت قاسية رغم أنها كانت مليئة بالحب والحنان، لكنها كانت قاسية لأنني اتحرمت من حضن الأم والأب، وعانيت من سوء المعاملة وأزمات نفسية بيني وبين نفسي".
وأوضحت: "مش كل الأمهات عندها إحساس الحنان والوعي بأن عندها طفل محتاج للحب والرحمة، والزواج عمره ما كان حرام، لكن القسوة غير المبررة وانعدام المشاعر والرحمة بين الأم وابنتها هما المشكلة".