حسام حبيب يعلق بعد مقلب رامز جلال: واثق في وعد ربنا وزعلان على اللي بيهاجموني

أكد الفنان حسام حبيب أن كلمات الفنان رامز جلال خلال مقدمة حلقته في برنامج "رامز إيلون مصر" لم تكن جادة، مشيرًا إلى أنه يعلم جيدًا أن رامز شخص محترم ولا يقصد الإهانة فيما قاله.
وقال حبيب في تسجيل صوتي لبرنامج Et بالعربي: "رامز أكيد بيهزر لأن رامز عارف إن الكلام اللي بيقوله مش حقيقي طبعًا، وأنا عارف إنه إنسان محترم وميقصدش الكلام ده، ولو فيه حاجة حقيقية مش هيهزر فيها".
وأضاف: "هو أينعم هزاره تقيل شوية بس أكيد ده هزار، وبقول للناس اللي بتهاجمني، لو أنا زعلان فأنا زعلان عليكم مش منكم، والموضوع بسيط، وربنا قال: (يا أيها الذين آمنوا إن جاءكم فاسق بنبإ فتبينوا أن تصيبوا قومًا بجهالة فتصبحوا على ما فعلتم نادمين)، فلما يتقال عن حد حاجة، اسمعها واحتفظ برأيك أيًا كان، بس متحكمش ومتهاجمش لأنك متعرفش هو صح ولا غلط، وفي الحالتين الموضوع مش بتاعك، وأنا عاذرهم بس خايف عليهم لأن اللي بيعمل كده بينسى إن ربنا مطلع وعارف اللي حصل".
وتابع: شكرًا وكتر ألف خير الناس اللي بتدافع، بس اعملوا زيي، أنا عمري ما دافعت، وعمري ما اتكلمت، وعمري ما هنزل لمستوى الخناقات والمعركة دي، المعركة أصلًا مش معركتي، أنا واثق من أفعالي، واثق من أخلاقي، واثق من تربيتي، واثق من خوفي من ربنا، أنا قلت للناس قبل كده، أنا وضعت سيرتي عند ربنا، فمش قلقان خالص، ربنا قال: (وَعِزَّتِي وَجَلاَلِي لَأَنْصُرَنَّكَ وَلَوْ بَعْدَ حِينٍ).
وأكمل: أنا واثق في وعد ربنا وعارف قدرته، وخايف على الناس عشان أنا واحد منهم وده اللي اتعلمته واتربيت عليه، إني محطش طرف تالت بيني وبين ربنا، ربنا عدل، رحمن رحيم، غفور رحيم قادر.
واختتم قائلًا: بتمنى للناس حياة سعيدة وسلام وصحة، ربنا قادر يعوضني، ربنا يجبر بخاطري بعد التجربة دي، يعوضني حياة جديدة وذُرية صالحة ونجاح مش بس في الشغل، في حياتي عامة، وأني أرضي أهلي، مكنتش أعرف هيقول إيه في المقدمة، وده كله هزار، اللي هيزعل من هزار يبقى بيصغر مخه، مفيش حاجة تزعلني، أنا عارف إن الكلام ده كله مش صح، وعمره ما هيهزني، هو رامز هزاره تقيل وناس كتير بتزعل منه، بس طالما هزار، أنا معنديش مشكلة خالص، ضحك الناس، وربنا يقدرني وأرد له المقلب ده في يوم من الأيام".
ووقع الفنان حسام حبيب ضحية لمقلب رامز جلال في برنامج رامز إيلون مصر بالحلقة السادسة التي عُرضت أمس الخميس على قناة MBC مصر.
View this post on Instagram
A post shared by ET بالعربي (@etbilarabi)
اقرأ أيضًا:
مسلسل الشرنقة الحلقة الثامنة.. أحمد داود يعاني من اضطراب الهوية الانفصالي
دينا الشربيني تتألق بإطلالة رمضانية.. والجمهور يغازلها (صور)
رانيا منصور تخطف الأنظار بإطلالة رمضانية.. والجمهور يعلق (صور)