ريم طارق تكشف قصة جدل فيديو انتهاء الخلافات مع طليقها حسن شاكوش

كشفت ريم طارق طليقة مؤدي المهرجانات حسن شاكوش، عن قصة جدل فيديو انتهاء الخلافات بينهما ثم عودة الحديث عن كونه كان شرطا لاستعادة كافة حقوقها.
وقالت ريم، ببرنامج "90 دقيقة" المذاع عبر قناة المحور: "أنا عملت فيديو إتكلمت فيه عن الصلح لأنه كان مشروط عليا ضمن الاتفاق أعمل كدة، وكان لازم أعمله قبل ما أدخل البيت بساعتين".
وتابعت: "أهل الخير تدخلوا من شهر بعد ما عملت كل حاجة علشان أخد هدومي وحاجتي الشخصية وحقوقي القانونية ومعرفتش، وبابا طلب إن حسن يعمل فيديو يعتذر فيه بعد ما سيرتي بقت على كل لسان".
وأوضحت: "الاتفاق كان إني أحصل على مؤخر 300 ألف جنيه، والقائمة وفيها غرف ب 200 ألف جنيه، و100 ألف جنيه قيمة الذهب، وإنه يعتذر في فيديو، وفضلنا في مهاترات لمدة شهر، وكل مرة يقول أنا في حفلة في الساحل ومش فاضي".
وأضافت طليقة شاكوش: "هو طلع في الفيديو لابس بيجامتي علشان يستفزني".
وكانت ريم طارق، طليقة مغني المهرجانات حسن شاكوش، شاركت متابعيها على حسابها الشخصي بموقع "انستجرام"، فيديو جديد، شرحت خلاله ما تعرضت له خلال الفترة الماضية، وكشفت حقيقة وجود صلح بينها وبين طليقها.
وقالت ريم في الفيديو "كان نفسي الانفصال يحصل بشياكة بس محصلش معرفش ليه، فيه سوء تفاهم هحكيلكم، الحمد لله المشاكل خلصت، آه محترم عشان اداني حاجتي اللي في البيت مكنتش عارفة اخدها، وأول إمبارح بالليل كان فيه عمو دخل ما بينا واتكلمنا أول ما هاخد حاجتي هطلع أقول إني أخدت حاجتي كاملة، لإن رحت البيت لقيت كل حاجتي موجودة بس لسه محصلش تناول لا على المحاضر ولا القضايا".
وأضافت "الاتفاق كان بالليل المفروض كنا نطلع في فيديو مع بعض نقول إن كل شيء انتهى بس لسه الاتفاق مخلصش. كنت في حلقة من يومين بالظبط مع الإعلامية مروة صبري، وقلتلها فيه ناس كبيرة اتدخلت في الموضوع وصلحت ما بينا إن كل واحد ياخد حقه، لإن أنا الوحيدة اللي كنت مسلوب حقي، الحمد لله مرتاحة أخدت حقي ومش الماديات خالص اللي كانت مضايقاني، مرتاحة إني عرفت أوصل لحل، كان شيء مستحيل إني كنت أعرف ادخل البيت تاني".
وتابعت ريم "معتذرتش قلت حق بابا وماما ومامته على راسي، أنا مغلطتش أنا كنت بطلع أقول إني عايزة حاجتي ولما اخدتها قلت، والله العظيم مخدتش ولا جنيه مش هاخد فلوس عشان أطلع أقول كده أنا قلت حق ربنا، مش حابة إن حد يطلع يعمل شو ويقول ريم اعتذرت أنا قلت خدت حقي لكن لسه القضايا محصلش تنازل عنها، مخدتش عفشي ولا قايمة اخدت بس الحاجات اللي جبتها، ولأ مرجعناش".
وقالت ريم "لا مش عايزة اتشهر طلعت على الميديا عشان أثبت حقوق مش اكتر، إلى حد ما حصل صلح اني اخد حقوقي وشرع ربنا، عشان ده الاتفاق، وبقيت أحسن ربنا ما يكتبها على أي بنت تبقى داخلة حياة تتمنى إن ربنا يكرمها وفي الآخر يتغدر بيها، أتمنى الموضوع يخلص على خير لأنه طول وبوخ زيادة عن اللزوم".
واختتمت "فعلا خراب البيوت وحش لو كان فيه حل من البداية إن الطلاق يحصل بهدوء كان حصل، حسبي الله ونعم الوكيل في أي حد يظلم حد وربنا يكتب لنا الخير جميعا ويوفقنا في حياتنا وبس هطلع تاني لما كل حاجة تبقى تمام ونتنازل عن القضايا".
وكان حسن شاكوش وريم طارق تبادلا الاتهامات عبر مواقع التواصل الاجتماعي قبل إعلان طلاقهما رسميا.