مصطفى قمر عن "أولاد حريم كريم": "مكنش مطروح فكرة إننا نعمل جزء تاني"

كشف الفنان مصطفى قمر عن تفاصيل بخصوص فيلم "أولاد حريم كريم".
وقال خلال لقائه ببرنامج ET بالعربي: " الفيلم اسمه أولاد حريم كريم فدلوقتي الأولاد موجودين وهنشوف الأحداث اللي هتحصل والحريم حصلهم إيه وكريم حصله إيه بعد السنين اللي عدت دي".
وأضاف عن فكرة الجزء الثاني: "مكنش مطروح فكرة إننا نعمل جزء تاني بس الفكرة بدأت تلح علينا من أربع خمس سنين فبدأت الحكاية تاخد شكل جدي من أكتر من سنتين واتكلمت مع أستاذة زينب عبدالعزيز السيناريست والأستاذ علي إدريس والأول الموضوع كان كأنه حلم وبدأت الفكرة بعدها تتبلور وبدأ الموضوع من هنا".
وعن مشاركة ابنه تيام العمل معه لأول مرة في الفيلم قال: "أنا دايما ببقى حساس إني أعرض على تيام حاجة يعملها معايا فدايما بسأله لنفسي يقولي أه حلو الفكرة دي واعمل كذا وكذا والفكر الجديد بقى بتاع الشباب ده مختلف وكمان تيام دارس حاجات كتير فأنا بحب أخد رأيه وأحب أعرف الحاجات الجديدة".
وأضاف: "فقولتله تيام أنا بعمل حريم كريم الجزء التاني تيجي معايا؟ قالي إنت بتسألني؟ طبعا معاك".
ورفض أن يكشف عن شخصية إبنه تيام في الفيلم قائلا: "أنا مش عايز أحرق حاجة".
فيلم "أولاد حريم كريم" بطولة: مصطفى قمر، بسمة، داليا البحيري، علا غانم، خالد سرحان، عمرو عبدالجليل، تيام مصطفى قمر، رنا رئيس، وهنا داود وعدد من الوجوه الجديدة، تأليف زينب عزيز وإخراج علي إدريس
ويعد استكمالا لنجاح الجزء الأول لفيلم "حريم كريم" والذي عرض قبل 18 عامًا وتحديدا في عام 2005، ولعب بطولته مصطفى قمر، ياسمين عبد العزيز، الراحل طلعت زكريا، داليا البحيري، علا غانم، بسمة، خالد سرحان، محمد شاهين، ومن تأليف زينب عزيز وإخراج علي إدريس