"مشاهدها الجريئة ومنع سوزان مبارك مسلسلها وأم كريم عبدالعزيز"..أبرز تصريحات سهير رمزي في"حبر سري"

كشفت الفنانة القديرة سهير رمزي، تفاصيل عديدة في حلقتها ببرنامج "حبر سري" حول حياتها الفنية والشخصية ومشاهدها الجريئة ووالديها وحقيقة شائعة زواجها من الفنان عمر الشريف، وحقيقة منع السيدة سوزان مبارك عرض مسلسلها.
نستعرض لكم أبرز ما قالته سهير رمزي بالبرنامج في السطور التالية:
- قالت إن بدايتها للعمل الفني كانت من خلال موهبتها ثم جمالها وعادت بعد ذلك بتقديم أدوار كانت الكلمة العليا فيها لموهبتها.
- "بزعل من نفسي دلوقتي لما بشوف الحجاب اللي كنت بعمله وكان طرح كتير وألوان كتير، لكن مش بزعل من النقد".
- "لو رجع بيا الزمن واتعرض عليا مشاهد جريئة لو دلوقتي هرفضها، لكن زمان كنت بعملها وأنا مقتنعة بها ومكنش في جرأة زي دلوقتي".
- "المشاهد الجريئة اللي كنت بعملها كانت في حدوتة الفيلم وفي سياق الموضوع، وده اللي كان كله بيعمله ومكنتش بعمل حاجة شاذة".
- "لو عندي القدرة أمسح أعمالي من على السوشيال ميديا واليوتيوب مش هعمل كدة، وده تاريخ وأنا عملته وملزمة به".
- "أنا بحب أخد الحاجة اللي من حقي ومخدتش ميراث والدي لأني مشوفتهوش ولا أعرفه، وفي ناس أحق بالميراث ده مني ومحدش أجبرني".
- قالت سهير، إن والدتها اقترحت عليها التنازل عن الميراث لعدم حاجتهم للفلوس.
- "والدي مصرفش عليا وأنا شفته مرة واحدة وعمري 13 سنة وصلتي اتقطعت مع إخواتي بعد موضوع الميراث ومعرفش عنهم حاجة خالص".
- "يا ريت إخواتي يتواصلوا معايا ويكون في ود بينا ومحدش فينا محتاج حاجة من حد إلا صلة الرحم ، واحنا محتاجين صلة الرحم وأتمنى يتوصلوا معايا والدنيا متستهلش حاجة".
- تريندات السوشيال ميديا ليست كلها جيدة وليست كلها سلبية ولكن مفهوم التريند حاليا يوجد به الكثير من الأمور السيئة.
- "أكتر حاجة كانت تريند ومتصحش كان عامل الكشري، وأكتر تريند فرحني كان مسلسل القاتل الذي أحبني مع هاني رمزي".
- "معنديش عقدة في تمثيل أمهات نجوم ولكن في ناس مينفعش أكون مامتها زي أي نجم مفيش شبه بيني وبينه قوي".
- "موافقة أجسد دور أم كريم عبد العزيز وغيره ودول ولادي وكل سن له حلاوته وده واقع وحقيقة".
- "جوازي من عمر الشريف إشاعة وهو من صغري كان فتى أحلامي، وكان فتي أحلام بنات كتير من جيلي، واتكتب كتير وقتها إننا اتجوزنا ولكن هو كان صديق".
- "أنا كنت من معجبي عمر الشريف ورحبت به خلال زيارة لمنزلي هو وضيوفه وعملت حفلة في البيت واستقبلته وانتشرت الشائعات بعدها".
-"أنا سمعت إن السيدة سوزان مبارك تدخلت لمنع عرض مسلسل (حبيب الروح) في التلفزيون المصري،، وكان المسلسل هيتعرض على القناة الأولى وكنت متفقة على كده، وفوجئت بعدم عرض المسلسل في أول يوم رمضان، وسألت المنتج المسلسل منزلش ليه قالي جت لنا أوامر منزعش المسلسل، لإنه بيعمل انتشار للحجاب، وإنتي لابسه الحجاب، والحجاب حلو، وفي ناس هتقلدك وتمشي وراكي، ولكن معرفش ده حقيقة ولا لأ، وإتوقف المسلسل ولم يذاع على القناة الأولى".