إنجي وجدان: "أمي عقدتني في حياتي ومش شايفاني حلوة"

تحدثت الفنانة إنجي وجدان عن نظرتها لنفسها وحملتها "إنتي جميلة زي ما إنتي"، وكيف أثر سؤال أمها عن الدايت ومقاومة السمنة على ثقتها بنفسها بالسلب.
وقالت للإعلامية سهير جودة، خلال لقائها في برنامج "الستات" على فضائية النهار: " أنا مقتنعة جدا بالوقفة قدام المراية الصبح تقولي لنفسك كام كلمة حلوين، وبالليل قبل ما تنامي تقولي كام كلمة حلوين، بالذات لما تحسي إنك محبطة.. إنتي جميلة زي ما انتي بقولها لنفسي وبقولها لأي حد".
وأوضحت "إنجي" أن حملتها التي لاقت رواجا على منصات التواصل الاجتماعي، بدأتها عام 2016 بعد إنجاب ابنها إسماعيل، قالت: "كنت حامل وفي الشهر التامن ومش مخبية، والاقي تعليقات انتي تخنتي كده ليه؟.. طبيعي أتخن".
وتابعت: "كانت بتجيلي رسايل من بنات مش واثقة من نفسها.. بنات صغيرة عايزة تنتحر وبنات مش واثقة من نفسها، وبنات بتقولي جوزي بيخوني، وحسيت عندي حتة قوية شوية لما بقع بقوم على رجليا، لكن في ناس معندهاش ده، فبقيت أقول انتي جميلة زي ما انتي حبي نفسك".
وأكدت أنها لا تشجع على السمنة لكن على أن يحب كل إنسان نفسه في كافة حالاته وصوره حتى تزيد ثقته بنفسه، "في سوبر موديلز ثقتهم صفر دول حياتهم بتدمر.. إنما لما تحبي نفسك تخينة رفيعة طويلة هتتعاملي مع الحياة بأي شكل".
وأشارت إلى أنها كانت توقفت عن رياضة الباليه المائي منذ مرحلة الثانوية العامة، وظلت تأكل بنفس النمط، وبدأت تزداد في الوزن تدريجياً، ومع الوقت تحول كلام أمها إلى مصدر للضغط عليها دون أن تدرك هي ذلك.
وقالت: "مامي قررت تعقدني في حياتي بسبب التخن ده، ففضلت تضغط عليا، ودخلت في دوامة ثقتي في نفسي مهزوزة وباكل واتخن ومش عارفة أخس".
ووجهت رسالة لها: "بقولها انتي اللي عقدتيني ولحد النهاردة بتسألني هتخسي امتى هتروحي الجيم امتى.. لازم تخسي.. لدرجة إن جزء من يومي بيلف حوالين انتي تخنتي ولا خسيتي ولا إيه".
وتحدثت "وجدان" عن تفهمها لحسن نوايا أمها، وأنها صديقتها المقربة، ومع ذلك ترى أن هذا الضغط سلوك خاطيء يقع فيه الأهل مع الأبناء، وقالت: "هي مش شايفاني حلوة زي ما أنا ومحببتنيش في نفسي.. هي معتقدة أن أصحابها أرفع منها، ومكانتش عايزاني أبقى زيها مش عايزاني ابقى تخينة في وسط الناس.. بس غصب عنها قلب بضغط زيادة و قعدت فترة من حياتي ثقتي مهزوزة عشان أقرب حد ليا أمي مخلياني مش واثقة من نفسي"