"ريحوا شوية".. بكري: "أرجو من الناس اللي في الساحل يبطلوا استفزاز"

انتقد الإعلامي مصطفى بكري، تصرفات بعض رواد منطقة الساحل الشمالي، التي وصفها ب الاستفزازية.
وقال "بكري"، خلال برنامج "حقائق وأسرار"، المذاع على قناة "صدى البلد"، اليوم الخميس: "في زيادة في الأسعار وفي ناس بتمص دم الشعب المصري، وبتوع الساحل بيستفزوا الناس"، متابعًا: "اللي بيحصل في الساحل ومظاهر عمرنا ما شفناها في أي عهد او زمن، دي ناس ناسيه ان اغلبيتنا ناس تعبانة وبيستفزونا اللي بيشتري عربية ب 5 مليون ماشي بس بلاش استفزاز وبص للغلابة.. انتم بتعملوا حالة استفزاز طبقي في المجتمع وبقول للناس في الساحل الشمالي ريحوا شوية".
وأضاف: "أنا شوفت فيديو لأخ خليجي بيتكلم عن السيارات اللي موجودة في العلمين، والله ولا كأننا دولة عندها فائض كبير، بتشتري سيارة ب 8 مليون ماشي بس بلاش تستفز الناس، نرجوا من إخوانا بتوع دولة الساحل الشمالي يبطلوا يستفزونا"، مضيفًا: "الشكوى الأساسية للمواطنين هي ارتفاع الأسعار، أين الأجهزة الرقابية، الرئيس مش هيعمل كل حاجة لوحده، دي بلدنا محتاجين نطبطب على الناس، ونمسك أي حد بيزود أسعار على الناس".
وأكمل: "الناس عايزة الستر، محدش عايز يبقى باشا، شوفلنا حل في أسعار المياه والكهرباء اللي طالعة نازلة"، مردفًا: "نتمنى أن يحدث استجواب في مجلس النواب الفترة المقبلة، كما يجب على الإعلام أن يواجه التشكيك".
وواصل، قائلًا: "أتمنى أن يكون أول قانون ينظره مجلس النواب في أكتوبر المقبل، هو اشتراطات البناء، فيه ناس تعبانة وشقيانة ومش لاقية، لازم أحطها في أولوياتي".