"انقسام في العائلة" ما موقف زوجة حسن أبو السعود تجاه تصريحات شيرين عبدالوهاب؟ (فيديو)

صرحت رنا حسن أبو السعود أنها لا تنوي اتخاذ أي اجراء قانوني تجاه الفنانة شيرين عبد الوهاب، خاصة وأن والدتها تؤيد موقفها، كما أكدت أنها لا تعلم موقف شقيقتها شيرين حسن أبو السعود، ما إذا كانت ستلجأ للقضاء أم لا؟.
قالت رنا حسن أبو السعود أثناء استضافتها عبر قناة "العربية" في برنامج "تفاعلكم": "أنا كل أصحابي وكل الناس في الوسط الفني، لقيت بوست كتيرة جدا، بيقولولي شفتي شيرين تكلمت على بابا، أنا من قبل ما أسمع أو أشوف هي قالت إيه؟، كنت متأكدة إن هي متقصدش، يعني أنا دايما هلتمس العذر أن هي متقصدش، لإن شيرين على سجيتها وبتطلع تتكلم بطبيعتها جدًا وتقول أي حاجة".
وتابعت رنا حسن أبو السعود: "لو شيرين قاتلالي قتيل أنا شخصيا بعد اللي سمعته قبل ما أتكلم في البرنامج، هي بتعدي بظروف صعبة جدا، أنا مش حابة فكرة الهجوم، وأن احنا نتخانق معاها، هي في الأول وفي الآخر طلعت كلمة مش قاصدها، أنا طبعا لا أقبل أي أهانة لبابا، بس أنا بفكر من ناحية تاني، أنا فجأة لما بابا توفى وهو في المستشفى لقيت شيرين نايمة على رجله وبتعيط وتبوس في رجله، وتقوله يا حسن متسبنيش، أنا أسفة، كان في خلاف قبل ما يتوفى بشوية، وتصالحوا، فلقيت حد بيعيط له متسبنيش يا حسن، هقعد من غيرك إزاي؟، فأنا آسفة ياحسن، أنا افتكرتها، حد قريب أمي أو عمتى، فبرفع كده لقيتها شيرين".
وأضاف: " بقيت أحضنها وأطبطب عليها، ودي واحدة كانت شبه مقيمة معانا، واحدة من أسرتنا، بتحب أبويا، يا جماعة بتموت فيه وبتحبه، وهو سبب شهرتها، وهي عمالة تقول كلام لإنها بتعدي من مشاكل جامدة، والبيان من أختي رشا، فيه شقين في العيلة، شق شايف أن دي إهانة عظمى زي أختي الكبيرة اللي رأيها فوق دماغي طبعا، وأنا رأيي إن لأ، بابا لو عايش نفسه كان هيكلم شيرين ويلا حبيبتي تعاليلي نتقابل ويهزر معاها، وهياخد الموضوع برحمة مش بالقفش، كله في البيت بيأيدوني، وماماتي معايا، وبيقولولي الموضوع بسيط، وهي مش قاصدها وهي اعتذرت يا جماعة، ونرحم بعض، وكنت عايز أقولها والله أنا مسامحاكي من قلبي".
واختتمت: "لسه بصراحة معرفش، هل أختي هتاخد إجراء قانوني، بس لو هي أخدت رأيي هقولها مستحيل، بصراحة لأ، مستحيل هرفع قضية على انسانة عشان غلطت في كلمة ضد إنسان هي بتحبه".