"كسر برجلها".. تفاصيل إصابة مريم الخشت خلال تصوير "مجنونة بيك"

كشفت الفنانة مريم الخشت، تفاصيل الإصابة التي تعرضت لها خلال تصوير مسلسلها الدرامي الجديد "مجنونة بيك" الذي تجسد خلاله شخصية "راندا"، ويُعرض على منصة "شاهد".
ونشرت مريم، صورا وفيديو يوضح مدى إصابتها، عبر حسابها على إنستجرام، وعلقت: "بداية السنة دي كانت مختلفة.. واختلافها في حاجات كنت متعودة عليها بقالي سنين وكلها اتغيرت، يعني السنة دي هي أول سنة مكنش في الراديو اللي بقالي فيه سنين، ومكُنش في رمضان لأول مرة من 5 سنين، ولأول مرة رجلي تتكسر وتخليني أقعد في البيت أطول فترة في حياتي في وقت بكل المقاييس اللي في الدنيا ما ينفعش يحصل فيه كدهّ، بس فعلاً ربنا كبير أوي ومش بيعمل حاجة وحشة، وأنا فعلاً مؤمنة بده".
وتابعت: "مسلسل (مجنونة بيك) تجربة مختلفة، وأول مرة تحصل في الوطن العربي، وأول مسلسل استعراضي غنائي.. كل الناس اللي بتشتغل فيه بتعمل أقصى وأكتر حاجة عندها عشان يطلع في أحسن شكل، وعدد استعراضات كبير وأغاني بتتحفظ وبتتسجل قبلها بفترة، وتيجي يا مريم يوم 30 مارس بعد أول أسبوعين تصوير تٌقعي على رجلك بعد مشهد عادي جداً، بعد الوقعة رجعت كملت التصوير، وبين توقيف التصوير وإننا نكمل لوقوف تصويره شهر كامل!".
واستكملت: "كل التفاصيل والحاجات اللي عيشتها كانت مخلياني مش فاهمة إزاي هرجع بعد شهر أقدم أكتر من 13 استعراض! اختفيت فترة طويلة، وبعدها رجعت أصور، وصورت كل الاستعراضات وأنا رجلي لسه فيها مشاكل بس حماسي لكل حاجة كان مخليني أحسن، متحمسة لكل حاجة حصلت في المسلسل اللي بتشرف إني اشتغلت فيه".
وأوضحت: "شكرا لكل الناس من المنتجة الجميلة سالي والي وحبايبي علي فايز وأحمد جمال، والمخرج صديقي الجميل جو بوعيد، وحبيبي مدير التصوير أحمد زيتون ومصمم الاستعراضات الهايل هادي عواضة، والكاتب الخطير وصديقي عمرو مدحت.. المزيكا اللي قدمها ومن أكتر الناس اللي شجعتني مصطفى الحلواني، والميكب ارتست حبيبتي آية عبدالحميد وزمايلي وأصدقائي اللي وقفوا جنبي جدا أمير المصري وآدم الشرقاوي وانتصار وإنجي كيوان ومراد مكرم، ولتيم الإخراج اللي حرفيا (شالني) المسلسل كله بعد الواقعة، ولكل الناس اللي اشتغلوا وطلع عينهم عشان المسلسل يخرج بأحسن شكل، متحمسة جداً تشوفوا (راندا) ومتحمسة تقولولي رأيكم".
مسلسل "مجنونة بيك" هو دراما غنائية استعراضية، ويعد النسخة العربية من المسلسل الأجنبي الشهير Crazy Ex – Girlfriend، الحاصل على عدة جوائز وترشيحات عالمية.
المسلسل تم الاستعانة فيه بمصمم الرقصات هادي عواضة الذي صمم رقصات ستار أكاديمي، ليقوم بتصميم استعراضات العمل.
ويتناول المسلسل قصة فتاة تعاني من اضطرابات نفسية صعبة تجعلها تتخذ قرارات تظن أنها ستجلب لها السعادة. "مجنونة بيك" من بطولة مريم الخشت، أمير المصري وآدم الشرقاوي، المعالجة الدرامية والسيناريو والحوار عمرو مدحت، وإخراج جو بو عيد وإنتاج سالي والي.