"اديتله صينية البسبوسة".. قصة أغرب عريس تقدم لنرمين الفقي

تحتفل الفنانة نرمين الفقي، اليوم الثلاثاء، بعيد ميلادها ال50، إذ أنها من مواليد 21 يونيو 1972.
نرمين الفقي لم تتزوج حتى الآن، وتحدثت عن سبب ذلك خلال لقاء لها ببرنامج "بيت العائلة" مع الإعلامية نجوى إبراهيم عبر قناة "النهار"، في سبتمبر 2021؛ وقالت: "مفيش قصة حب حاليا، والله لو في هقول، في بداية حياتي كان في عرسان كويسين خالص، لكن أمي كانت بتحبني زيادة عن اللزوم، هل ده كان نوع من التملك؟ لكنه بيندرج تحت بند الحب، كانت دايما بتطرد الخُطاب، وبتطلع فيهم أي عيوب".
"نرمين" خلال اللقاء كشفت أيضا عن قصة أغرب عريس تقدم لخطبتها؛ وقالت: "كنت عاملة لهم عزومة، دخلت والدته والله قالتلي كده بالظبط: (إيه ده أنا مكنتش متصورة إن نرمين الفقي ساكنة في شقة صغيرة كده؟)، قومت بصيت لها وضحكت، وعيلتي كلها موجودة، أمي قالتلها إن دي شقة والدتها الله يرحمها، قامت ردت وقالت: (طيب وأنتوا بتعملوا إيه بالفلوس اللي معاكم دي؟ مش تعملي لنفسك فيلا كده؟ ده أنا قولت هدخل بيت محصلش!)".
أضافت: "ابنها كان حد كويس أوي، بس شخصيته كانت ضعيفة، ولم أعاقبه بسبب أمه واديتله فرصة، وقالي إحنا هنسافر لأنه شغال في السلك الدبلوماسي، وكنت مبسوطة من علاقتي بيه لأنه كان إنسان لطيف أوي.. لكن بعدها اديتله صينية البسبوسة، جيبتهم بيتنا في الإسكندرية في الفيلا بقى، وقولتلها أدي البيت اللي حضرتك عايزة تشوفيه، وكتر خير جدتي إنها ادتني شقتها الصغيرة عشان أعيش فيها لما جيت القاهرة، جبتهم إسكندرية وفي إسكندرية رفضته وقولت لوالدته أنا مش موافقة".
نرمين الفقي درست في مدرسة فيكتوريا كولدج، ثم تخرجت في كلية التجارة جامعة الإسكندرية، اكتشفها طلعت يوحنا ودخلت مجال الإعلانات في بداية التسعينيات، ثم بدأت تشق طريقها في مجال التمثيل في أواخر التسعينيات، ومن أبرز أعمالها: "الليل وآخره"، "عرب لندن"، "بنات عمري"، "رد قلبي"، "أبناء دهشان"، "طريق السراب"، "الماضي يعود الآن"، "حياة الجوهري"، "كارنتينا"، "أحلامنا الحلوة"، "ألف ليلة و ليلة"، "للثروة حسابات أخرى"، "حكاية بندق"، "ورد النيل"، وغيرها.
اقرأ أيضا| معلومات عن نرمين الفقي.. حقيقة زواجها من نجم شهير وهذه مواصفات فتى أحلامها