أمير كرارة عن عدم ظهور شقيقه في أعماله: "اللي بعمله معاه جدعنة"

رد الفنان أمير كرارة على ما أثير من أقاويل حول عدم مساعدته لشقيقه أحمد كرارة في مجال الفن، قائلا: "اللي أنا بعمله مع أخويا ده جدعنة وهو عارف ده كويس، أنا وأحمد قريبين من بعض، وعلى فكرة هو شغال كويس وجاله مسلسلات كتير.. ماينفعش نبقى احنا اللي الاثنين في عمل لأنه مش صح".
وأضاف كرارة خلال استضافته ببرنامج "حبر سري" على قناة القاهرة والناس مع اسما إبراهيم: "هو يشتغل لوحده وأنا أشتغل لوحدي.. هو أنا ما أتمناش إن أحمد كرارة يبقى أحسن مني 100 مرة.. ده أخويا وحبيب قلبي، وفي شغل بيننا مع بعض في حاجات شغل تاني غير التمثيل وهو المسؤول عنها مش أنا.. لكن حتة التمثيل بالذات عمره ما طلبها مني ولا طلع اتكلم وقال لحد من أصحابنا أمير ما أخدنيش.. علشان هو راجل فاهم وكبير ومقتنع أن ده صح، علشان محدش يطلع يرجع يقول: طب بص عمال ياخد أخوه في كل حاجة واحنا لا".
وتابع: "طب مثلاً، في ممثل كان في الاختيار السنة اللي فاتت عجبني قوي، ولما سألت عليه طلع مين.. ابن خالد النبوي، خالد النبوي ده اسم كبير.. وممثل كبير وعقبري، هو يعني مش قادر ياخد ابنه معاه في أي عمل؟! لكنه فاهم كويس وبيفكر صح وبيحب الشغلانة وبيخاف على مهنته واسمه وبيخف على ابنه، ولما شاف ابنه بيشق طريقه لوحده بقى مبسوط أنه ما عملوش حاجة لكن شايف ابنه بقى راجل واعتمد على نفسه وكل الناس كانت بتتفرج عليه في اليوم ده وبتقول: ده ابن خالد النبوي".
ووجه رسالة لشقيقه قائلا: "اشتغل يا أحمد لوحدك..اه ممكن حد يبقى في ضهرك وينصحك.. أنا أوقات بنصحه لأنه آه أكبر مني لكني أقدم منه في الشغلانة، وهو مش متضايق حتى من ده.. لو هو متضايق كنا ممكن نتكلم في ده، لكن هو عارف أن ده الصح، ولو كان اشتغل معايا كان اتأذى، لأن هيتقال: أخوه اللي مشغله".