التمن كبير قوي.. السيسي في يوم الشهيد: أشكر الأسر اللي كبَّرت وضحّت عشان نعيش كلنا

قال الرئيس عبد الفتاح السيسي، مخاطبًا أبطال الأفلام التسجيلية الخاصة بالاحتفال بيوم الشهيد والمحارب القديم: عيشتونا في الحقيقة اللي بتعيشها أُسر كتير بتقدم ابنها شهيد أو حتى مصاب.
وأضاف الرئيس السيسي، خلال حضوره فعاليات الندوة التثقيفية ال35 للقوات المسلحة، اليوم الأربعاء؛ بمناسبة الاحتفال بيوم الشهيد والمحارب القديم: باشكركم؛ العمل الدرامي بيدي فرصة لينا كلنا إنه يسجل وقائع يمكن إحنا مش بنعيشها كلنا، لكن بالطريقة بتتنقل وتدخل كل بيت، ويشوفوا التمن اللي بتدفعه الأسر بعد ما كبَّرت وضحّت وبقى اللي قدمته شهيد أو مصاب.. بعد ما كان ملو الدنيا بقى شهيد، وهو شهيد ملو الدنيا برده...
وتابع رئيس الجمهورية: لكن فراق الابن أو الزوج أو الأب صعب؛ باشكركم، وباقول لكم يا مصريين، الفقرة دي بتورينا أد إيه فيه تمن كبير أوي اتدفع عشان احنا كلنا نعيش.. أقل تمن ندفعه، نحافظ على اللي همَّ ضحوا من أجله، زينة شباب مصر من كل حتة جيش وقضاء وشرطة وكل مصري.
وأضاف السيسي: الكلام اللي قاله نور، صدقوني كل الجيش بيقوله، همَّ عايشين حالة محتملة للشهادة، عايشين فكرة الشهادة، الكلام ده.. مقبل غير مدبر، السلاح في إيدي، لو روحتوا هنا أو في سيناء، هتلاقوا ده، الدراما تعكس واقع شبابنا؛ عنده زوجة وطفل محتمل أه، ماقالش هقعد لغاية ما ييجي الطفل، لو الشؤون المعنوية جابت القصص الحقيقية لكل شهيد، هتجدوا كنز حقيقي، بيوت مصرية عادية خالص متوسطة أو أقل، ماعندهمش غير نفسهم يقدموه.
وكان في استقبال الرئيس السيسي لدى وصوله الاحتفال رئيس الوزراء الدكتور مصطفى مدبولي، والفريق أول محمد زكي، والقائد العام للقوات المسلحة وزير الدفاع والإنتاج الحربي، وعدد من كبار رجال الدولة، وقادة القوات المسلحة.
وتحتفل مصر والقوات المسلحة في ال9 من مارس من كل عام ب"يوم الشهيد"، والذي يوافق ذكرى استشهاد الجنرال الذهبي الفريق أول عبد المنعم رياض، عام 1969، وهو وسط جنوده البواسل على جبهة قناة السويس أثناء حرب الاستنزاف.