"الكلام اتنقى بالحرف واتشال منها شوية دلع".. كواليس "عود البطل" لعمر كمال وشاكوش

قال المطرب عمر كمال إن كلمات أغنية "عود البطل"، كُتبت قبل أزمة منع مطربي المهرجانات من الغناء بقرار من نقابة المهن الموسيقية، موضحًا: "عود البطل كانت مكتوبة قبل المشكلة ماتحصلنا".
وأضاف "كمال"، في تصريحات ل"مصراوي": "لما المشكلة حصلت، قررنا نغير كل كلام الأغنية وحرفيًا نقينا كل كلمة، ومبقاش فيها إيحاءات ولا كلام خارج من بعيد أو من قريب".
وعن كون الأغنية تتضمن إيحاءات وألفاظ خارجة قبل تعديلها، نفى قائلًا: "مكنش فيها إيحاءات لكن كان فيها شوية دلع كان ممكن ميتقبلش، واحنا خوفنا من ده، وعدلنا الكلام حرف حرف وشلينا شوية الدلع دول، وخلينا الكلام تمام جدا ومفيش غبار عليه، وكل اللي هيسمعها هيتبسط، والكلمات مش هتأذي حد خالص".
وتابع: "حقيقي الناس تعبانة وأنا وشاكوش، عايزين نعمل حاجة حلوة وأغنية مبهجة، احنا كل هدفنا إننا نفرح الناس، وعملنا بنت الجيران بس بطعم تاني ومزيكا تانية، وبلحن مختلف، ودي السكة اللي احنا واخدينها".
وأضاف: "عود البطل أغنية مش مهرجان، هي بطعم المهرجان ونفس الباور لكنها أغنية".
واختتم:" الأغنية من كلمات مصطفى حدوته وتوزيع إسلام ساسو، نفس تيم بنت الجيران".
وتصدرت أغنية "عود البطل"، قوائم الموضوعات الأكثر رواجًا بعد ساعات قليلة من طرحها بموقع "يوتيوب"، وحققت مليون مشاهدة عبر الموقع.
كان الفنان هاني شاكر نقيب الموسيقيين قد أصدر بيانًا أمر فيه بمنع التعامل مع مطربي المهرجانات نهائيًا، وذلك في أعقاب أزمة ‏غناء مهرجان "بنت ‏الجيران" لحسن شاكوش وعمر كمال في حفل عيد الحب في استاد القاهرة، بنسختها القديمة.