مدين يرد على اتهامه بسرقة "حاجة مستخبية" من لحن تركي وإسرائيلي

هاجم الملحن مدين، الفنان الكبير حلمي بكر، بسبب التصريحات التي أدلى بها الأخير في حوار أجراه مع برنامج "الحكاية" الذي يقدمه المذيع عمرو أديب على قناة MBC مصر، أمس السبت 15 فبراير، وقال فيها إن "حاجة مستخبية" لم تحقق نجاحًا وأن اللحن مسروق.
ونشر مدين صورة مجمعة في إطار واحد، عبر حسابه الرسمي بموقع "إنستجرام"، للفنان محمد حماقي، ومطربي أغنية "بنت الجيران"، والنجمة التركية إبرو.
وعلق مدين على الصورة: "فيه موضوع كل الناس بتتكلم عنه إلا أنا رغم أن أنا صاحب الموضوع وهو لحن (حاجة مستخبية)، واللحن التركي والإسرائيلي كمان ومهرجان (بنت الجيران)، بس أنا ساكت عشان ما بحبش أعمل شو عالفاضي".
تابع مدين: "بس لما الاقي الأستاذ حلمي بكر طالع امبارح مع الأستاذ عمرو أديب في برنامج (الحكاية)، وقناة مهمة زي mbc بيتكلم على لحن أغنية (حاجة مستخبية)، ان ده لحن ما حققش نجاح مع المطرب اللي اخدها (يقصد حماقي)، وان اللحن ده مسروق من لحن تركي".
أضاف: "عايز أقوله يا استاذ حلمي اللي حضرتك ما تعرفهوش ان الحمد لله لحن (حاجة مستخبية) كان مع مطرب كبير مش نكرة وهو الفنان الكبير محمد حماقي، وحقق نجاح كبير جدا في مصر والوطن العربي لدرجة إن النجاح ده وصل لتركيا وتواصلوا معايا بكل احترام واخدوا مني اللحن بشكل رسمي واتترجم للتركي مع نجمة كبيرة بحجم ebru_yaşar ".
واستطرد: "وحضرتك ممكن تتأكد بنفسك إن اسم الملحن (محمد احمد فؤاد) زي اسمي في التنازل وبتواصل دلوقتي معاهم عشان اسم الشهرة، وعايز أقول لحضرتك حاجة قبل ما تطلع في برنامج كبير زي ده لازم تتأكد من معلوماتك كويس، عشان انت كده مافرقتش عنهم حاجة هم سرقوا مجهودي وحضرتك بتضيعه وده شيء يؤسفني انه يخرج من أستاذ كبير زي حضرتك، ومش بس كده للأسف في حد اتهمني كمان إني سارقه من إسرائيل، دخلت لقيت انهم سارقين مني فعلا جزء من اللحن مش اللحن كله والتاريخ كان من بعد نجاح الأغنية بثلاث سنوات وده للتوضيح مش اكتر".
View this post on Instagram
A post shared by Madian (@madian1st) on Feb 16, 2020 at 5:06am PST