"يختلق وقائع كاذبة وسأتخذ الإجراءات القانونية".. الطيار الموقوف يرد على محمد رمضان

قال الكابتن أشرف أبو اليُسر، الطيار الموقوف بسبب أزمة محمد رمضان: "ما طلبتش تعويض من حد؛ لأن تاريخي ووضعي اللي كان هينتهي بعد 3 سنوات ونص بتكريمي، النهارده انتهى بفصلي عن الشغل، ولم أتلقَّ أية مكالمة تليفون واحدة من الفنان محمد رمضان، وماحصلش منه ولا حتى جبر خاطر ليَّا".
وأضاف أبو اليسر، خلال مداخلة هاتفية مع برنامج "على مسؤوليتي" على فضائية "صدى البلد"، اليوم الثلاثاء: "تم سحب رخصتي لقيادة الطائرات؛ وهو ما يمنع عملي في شركة طيران داخل أو خارج مصر"، معقبًا: "سأتخذ الإجراءات القانونية ضد تشويه الفنان محمد رمضان صورتي أمام الرأي العام، وراضي بالقضاء المصري الذي يفصل في هذه المشكلة وادعاءات محمد رمضان واختلاقه وقائع كاذبة حول طلبي له بالحصول على 9.5 مليون جنيه تعويضًا".
وتساءل الطيار الموقوف: "ازاي هاقبل أي اتصالات من الفنان محمد رمضان، بعد إيه؟!"، مضيفًا: "معاش القوات الجوية اللي بيجيلي هو اللي معيّشني دلوقتي، وقرار سحب الرخصة منِّي يعتبر إعدامًا بالنسبة إليَّ"، مناشدًا وزير الطيران المدني إعادة النظر في العقوبة.
وتابع أبو اليسر: "لازم الناس تبقى عارفة ومقتنعة إني ما سمحتلوش إنه يقعد على الكرسي في غرفة القيادة.. هو اللي قعد على الكرسي، وأنا ماعنديش باب فاصل بين الركاب وحجرة القيادة، ولما طلب مني يتصور قال إن الصورة التذكارية عشان ابنه مش فيديو للدعاية، وما كانش في الطيارة غير محمد رمضان وأخوه محمود رمضان والمصور وصديقه سعيد إمام".
وأوضح الطيار الموقوف: "أنا ماعنديش مشكلة إن الفنان محمد رمضان يتصور براحته في الطيارة، إنما يتصوروا داخل حجرة القيادة وتطلع صورتي بالشكل ده، واللي أكتر منه إن اللي بيصوره بيقول والله العظيم محمد رمضان هو اللي سايق الطيارة! طب ازاي وفيه مليون رادار ممكن يقول لي بتعمل إيه يا كابتن في الكابينة؟!".
وواستطرد أبو اليسر:"أي شو عايزينه يحصل مش هيكون على حسابي أنا، وأنا اللي دفعت التمن وناس كتير حوَليَّا، يساوي إيه لما ابني الصغير يقول لي اتطردت من الشغل ليه؟!".
وأضاف الكابتن نهاد حافظ، مساعد الطيار الموقوف لمدة سنة بسبب الأزمة: "فوجئت بمحمد رمضان مع أصحابه يشاهدون فيديوهات ولم أتبيّن حينها ما هي، ولقينا السوشيال ميديا مقلوبة بسبب الفيديو، ولقيت نفسي موقوف لمدة سنة، وفي الشارع، ولولا المعاش بتاع القوات الجوية ماكنتش هاعرف أعيش".
وتابع حافظ: "أنا دلوقتي في الشارع وعندي مسؤوليات وبِعت عربيتي"، مناشدًا وزير الطيران بإعادة التحقيق في الواقعة.