درجات داليا البحيري بالثانوية العامة وسبب تكسير أحمد العوضي لمعرض سيارات.. تصريحات نجوم "الفن×أسبوع"

تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة. وفي السطور التالية، يستعرض "مصراوي" أبرز 7 تصريحات لأهل الفن في البرامج الفنية خلال الأسبوع الماضي "مدحت صالح يكشف سبب امتناعه عن شرب الخمر، وتفاصيل مشاجرة أحمد العوضي وتكسيره لمعرض سيارات، مجموع داليا البحيري في الثانوية العامة، ..".
مدحت صالح
استضافت المذيعة سمر يسري في حلقة جديدة من برنامجها "حفلة 11" المعروض على قناة ON E، الفنان مدحت صالح، وضمن تصريحاته في البرنامج، كشف أن في أول شبابه كان يحب شرب الخمر، حتى قرر الابتعاد عن هذه العادة لأنها ليست بالشيء المفيد.
وقال "كل ما تتخيليه عملته أي أخطاء تتخيليها عملتها في هذا الوقت، لكن الفكرة هل هتستمري في الخطأ ولا تقفي مع نفسك، والحمد لله إن الثوابت والأصول كانت هي اللي بتفرمل لأن برضه الحياة مغرية، وفيه حاجات تفتن كتير وتتمني كل الحاجات اللي في الدنيا وده غلط، بنحتاج وقت والتجربة بتعلم"، متابعًا "بطلت شرب لأني بقيت عصبي، وممكن أزعل حد وانفعل بشكل مش المفروض يحصل".
أحمد العوضي
وفي حلقة أخرى، كان ضيف سمر في نفس البرنامج الفنان الشاب أحمد العوضي، الذي كشف تفاصيل تعرضه للنصب، وتكسيره لمعرض سيارات، قائلًا "كسرت معرض العربيات من فترة كبيرة من 10 سنين، كنت متخرج وبعدين بابايا قالي هاجبلك عربية، واحد وسيط قالي تأجر عربية للمعرض وتاخد أربع آلاف جنيه، وقتها كنت مصاحب واحدة بحبها وعايز أخرجها فأربع آلاف جنيه وقتها رقم، عربية زيرو خرجت بيها مرة وكان صعبان عليا وأنا بوديها".
وأضاف "رحت لناس لقيت 3 قاعدين وعملت ناصح ومفتح وعقد وكده، عدى شهر واتنين وتلاتة وانا مباخدش منهم فلوس، كنت مصفي النية وقلت هاخد الفلوس كلها على بعض، جه واحد صاحبي معايا اسمه أحمد الكردي حكتله قالي الناس دي نصبوا على العربية، رحت للناس فين العربية قالولي مفيش عربية ولو جيت هنا تاني هنعمل ونسوي، صعبت عليا نفسي وأنا عندي مشكلة إني مبحبش أسيب حقي حتى لو حصلي إيه، القسم اللي جنب المعرض الضابط لسه صاحبي لحد النهاردة، رحت له وحكيت له قالي الناس دي نصبت عليك بس أنا معاك وبتاع وأنا هجبهالك".
وتابع "قعدت مع نفسي، قلت هما هددوني والضابط قالي هجبلك العربية، وقلت لصاحبي أنا هدخل أعمل نمرة على المكان، دخلنا كسرنا المعرض احنا الاتنين. دايما كف السابق غالب، أول قلم بيخطف اللي قدامك ونعمل حاجة مش متوقعة، عملت محضر إنهم خدوا العربية وضربوني، وخدت العربية بعد 6 ساعات".
إدوارد
استضاف الفنان شريف منير وابنته "أسما"، في حلقة جديدة من حلقات "أنا وبنتي"، المعروض على قناة ON E، الفنان إدوارد، والذي كشف عن رسوبه في رابعة ابتدائي بسبب مادة العلوم، التي كان لا يحب مذاكرتها بسبب المدرس.
وقال إدوارد "مكنتش مرتاحله نفسيًا فمكنتش بذاكر خالص وكنت بدرس بالفرنساوي، كان دكتور وجاي يدرس ممكن احساس التعالي انه دكتور وبيدرس لأطفال فعايزنا نفهم اللي هو بيقولوا".
داليا البحيري
حلت الفنانة داليا البحيري ضيفة على برنامج "أنا وبنتي"، وتحدثت عن فترة دراستها، لافتة إلى أنها كانت في الثانوية العامة "علمي علوم"، وحصلت على مجموع 69%، والتحقت بكلية سياحة وفنادق.
أمير كرارة
انتقد الفنان أمير كرارة، أثناء استضافته في برنامج "قهوة أشرف" الذي يقدمه الفنان أشرف عبدالباقي على قناة الحياة، السوشيال ميديا، وما تسببه من أذى في كثير من الأحيان، قائلًا "دلوقتي السوشيال ميديا صعب أوي، ساعات حلوة وساعات مؤذية وأذيتها وحشة، الحلو تمام لكن لما بيطلعوا حاجة وحشة بتنتشر بشكل غير طبيعي، بتأثر وبتضايق اللي بيضايقني اكتر انك تكون فاكر نفسك عامل حاجة كويسة فتلاقي الناس بتأولها لحاجة تانية".
محمد هنيدي
استضافت الفنانة إسعاد يونس ضمن حلقات برنامجها "صاحبة السعادة"، الذي تقدمه على قناة DMC، الفنان محمد هنيدي، وتحدث عن كواليس أعماله الفنية، ومنها مسرحية "حزمني يا".
وقال هنيدي "فيه مفارقة ظريفة حصلت لما فتحنا أول أسبوع مكنش الإقبال زي ما توقعناه، رغم إن الأسماء المشاركة في العرض كبيرة، قلقنا 10 أيام ولقينا واحد من الصحفيين الكبار كتب الأب بيحزم بنته على مسرح في المنيل، المسرحية كان اسمها (حزمني يا بابا) فوقفوا المسرحية، وحصل تفاوض قالوا شيلوا يا بابا وخلوها (حزمني يا)، رجعنا لقينا طابور من أول الكورنيش لحد المسرح اتخضينا ودخلنا في موجة نجاح ممتعة جدًا يارب ترجع تاني، كنا بنروح المسرح من الساعة أربعة".
وأشار إلى حضور الفنانة سعاد حسني لمشاهدة العرض، ورغبت ألا يراها أحد، موضحًا "في مرة واحنا على المسرح البالكون كان بيبقى كل يوم كومبيله، في يوم لقيناه ضلمة نسأل يتقالنا مفيش حاجة، خفنا يكون الجمهور إقباله قل، وبعدين عرفنا إن الفنانة سعاد حسني كانت بتتفرج على المسرحية واحنا مكناش نعرف ومشفنهاش".
صلاح عبدالله
حكى الفنان صلاح عبدالله، موقف جمعه بالفنان الراحل عبدالله غيث، أثناء تصوير مسلسل عُرض في الخليج ولم يُعرض في مصر، وذلك أثناء استضافته في برنامج "صاحبة السعادة".
وقال صلاح "هحكيلك موقف عن مسرحية العسكري الأخضر. ألف رحمة عليه الفنان عبدالله غيث كنت بعمل مسلسل للأسف متذاعش في مصر وكنت ملازم ليه في العمل ده، كنت فاكره شخصية صعبة وطلع خفيف الظل جدًا وبيحتضن المواهب والناس اللي بيشتغل معاهم، كنا قاعدين بين مشهدين لقيته بيقول (عسعس كاريه كاريه) –كلمات أغنية كتبها صلاح في المسرحية-، فقلت ماله فيه ايه، قلتله فيه ايه يا أستاذ، قالي (نفسي أعرف مين ابن .. اللي كتب الكلام ده)، فقلتله ممكن تقول رأي حضرتك من غير شتيمة، وكان عارف إني بكتب فقالي (هو انت اللي كاتب ده)، قالي (تعرف يا واد يا صلاح في البيت عندي طايرين بيها وبيغنهولي وأنا حفظتها)".