ننفرد بنشر أسعار الحشيش في العيد ياوزارة الداخلية

صبى من الصبيان التابعين لتاجر مخدرات يفتح قلبة وصدرة لمنصورة نيوز ويكشف اسراردقيقة جدا ولابد من السيد اللواء محمد ابراهيم وزير الداخلية ورجالة متابعة هذا التحقيق للقضاء على تجار المخدرات على مستوى الجمهورية ليعش الشعب المصرى فى أمان واستقرار حتى ينهض الشباب بمستقبل مصر الغالية
إحنا ماشيين بمبدأ مش قادرة تشتريه بيعيه والعيشة صعبة وكله بيبعية
البرشامة ب 10 جنيهات وصيدليات كبيرة بتورده بنسبة على كل 100 شريط الهيروين سعره رخص من 400 جنيه ل 50 جنيهًا وعلشان كده هو البريمو.. مرتين منه تحولك مدمن
الإسكندرية الراعي الرسمي لمكابس الحشيش.. وفي أبوتلات بيتباع علني ورخيص
حكاية الكف المنقرش وزهرة اللوتس والبانجو المانجاوي
العيد موسم لينا زى بتوع اللحمة بالضبط.. الحكومة شدة حيلها علينا لو الشباب عايز حشيش خليه يشتكى للحكومة ..ثمن الحشيش هيزيد الضعف .. زيت الحشيش الإضافة الجديدة لدماغ الحشيش ..عندنا حشيش بس مش هنبيع غير للى نعرفه .
الحشيش يختلف هذا العيد
قال لى أحد الصبيها رفض ذكر اسمه إن الحشيش شاحح في السوق جدًا في هذا الموسم ولن يكون منتشرًا كما كان الموسم الماضي .
معللًا ذلك بأن "الحكومة شدت حيلها أوى علينا ومش عارفين نبيع.. مش كل الناس هتتكيف العيد دا زي ما هو معتاد" .
موكدًا أن ذلك ليس سببه عدم توافر الحشيش مع التاجر ولكن في شد جامد من الدخلية بيخلينا نفكر 100 مرة قبل ما نبيع سجارة واحدة والمناطق كلها بقت مترشقة مخبرين .
احنا هنبيع برده بس في السر أكتر من الأول ومش أى حد هنبعله غير زبايينا المعروفين ولو الشباب معترض على أن الأسعار غليت، يروح يكلم الحكومة تخف عننا شوية.
مستكملًا الشباب كمان مزاجه اختلف عن الأول بقى يجى مجموعة من الشباب ليلة الوقفة يلموا نفسهم ويطلبوا أنبوبة زيت الحشيش الخام بتبقى 2سم ب 500 جنيه يضعوا القليل منها على السجارة الملفوفة بتعملهم دماغ أعلى بكتير من السجارة الملفوفة العادية .

أسعار الحشيش هذا العيد
أكد أيضًا أن سبب هذا الشد من الحكومة جعل كيس الحشيش اللى تمنه 2000 جنيه بقى 3000 طب أنا هكسب فيه كام سيجارة، الحشيش اللى كنا بنبيعها ب20 جنيه مش هنبعها أقل من 40، والشباب غصب عنه عاوز يتكيف سعر الحشيش هيزيد الضعف هذا الموسم والشباب كله بلا استثناء بيبقى مستنى يوم الوقفة، دول شعارهم "اليوم خمر وحشيش"
عملية الشراء والبيع
ذكر الصبى لمنصورة نيوز عن كيفية أخذ البضاعة وتوزيعها، حيث يقوم بأخذها من عدد من المعلمين بيبعوا مخدرات، فيذهب لأخد مثلًا حتتين ب 5000 جنيه بيقطعهم أرباع، الربع بيبقى عامل 450 جنيهًا، والصباع بيبيعه ب 150 جنيهًا والصباع بيعمل 10 سجاير.
كما ذكر أيضًا أن نظام الشراء بيبقى بالتقسيط، حيث إنه لو يملك ثمن الحتيتين هيبيع الحشيش ليه .
فبعد أن يقوم بتوزيع الحشيش يرجع مرة أخرى لرد الفلوس للمعلم الذى ذكر أنه لو مسددش الفلوس يمكن أن يعيش طول عمره حزين على نفسه من اللى ممكن يعملوا المعلم فيه، غير أن المهنة بتاعتهم بتعتمد على الشرف والرجولة مع المعلم .
التعامل مع الزبائن
بيتم التعامل بطريقتين بين الصبى موزع الحشيش والزبائن
الطريقة الأولى: مباشرة لو كان شغال تبع دولاب معين بيتعرفوا عليها أول مرة بيشتروا منه، وبعد كده بيبقوا زباين عنده.
الطريقة التانية: ودي تخص الناس الراقية اللي مستواهم المادي عالي جدًا بيبقى التعامل بالتليفون .
فبياخدوا رقم الصبى ويكلموه توصلهم الكمية المطلوبة من المخدرات زي الديلفري يعني.
سلسلة بيع المخدرات
عملية البيع بتبقى زى السلسة بتمر من الصبى صغير إلى الكبير ده بيبقى رجل أعمال كبير معاه ملايين بيشترى كميات كبيرة ويوزعها على المعلمين اللى في السوق، والصبى الصغير بياخد من المعلمين دول، عاملة زى السلسلة بتبدأ من أكبر معلم لأصغر صبى الصغيريين بيتعامله مع الناس اللي بتشرب عشان تتكيف بس .
كما اختلفت طريقة بيع الصبى للمخدرات عن زمان، كنا نرى الصبى واقف على الشارع وبيبيع فى السر الموضوع بقى أسهل بكتير، كله بيتم في التليفون.
أماكن تمركز المخدرات
أكبر تجمع بيبقي متمركز فى مناطق زى مصر القديمة، شبرا، دار السلام، طرة البلد، المعادي .
ومنطقة أبو الغيط تبع القليوبية وهى أكبر منبع من منابع الحشيش، وفيها مكابس حشيش بأعداد مهولة .
أيضًا منطقة الجيارة فيها زيادة عن أربع دواليب، الدولاب بيورد فى اليوم صندوقين الصندوق فيها 12 كيس، يعملوا زيادة عن 4000 صباع، فلو المعلم جايب الصندوق جملة ب 25000 جنيه يكسب عليهم 150000 جنيه .
كيفية دخول أماكن الدولايب
اتضح أنه من السهل دخول أى شخص لمكان الدولاب عادى ويخرج لأن الدولاب دا عبارة عن مكان فاضي حواليه أكثر من عشرين رجل ماسكين سلاح لتأمين المكان من برة فى حالة حدوث أى خطر بيصدروا إشارات إنذار جوة على مثال كدة مسلسل الباطنية، بالرغم أن المسلسل مابيوصفش ربع الحقيقة، ومن جوة زي السوق فى ناس كل واحد ماسك صنف معين عارضه وبيتاجر فيه اللي معاه حشيش، واللى معاه أفيون، واللى معاه برشام، واللى معاه بودرة، واللى عارض بانجو .

أسعار الحشيش في الدولاب
الدولاب مش بيفرق بين غني وفقير، الفرق الوحيد هو التسعيرة بعشرة جنيه ممكن الشخص يتكيف حشيش !، هو الدولاب بيبقى عامل تسعيرة لكل أنواع الحشيش، المعلم الكبير بيبقى مقعد عدد من الأشخاص جنب بعض، في اللي بيبيع بمائة جنيه واللى بيبيع بخمسين واللى بيبقى مضروب وبيتباع بعشرين وعشرة جنيهات، واللى بيوصل ل 450 جنيها وده بيبقى بتاع الناس التقيلة أصحاب المراكز فى البلد .
كما أن سعر كيس الحشيش من المكبس نفسه مش بيعدى ال 500 جنيه على ما بيوصل لاصغر صبى بيبقي ثمنه 2500 وكل معلم بياخدلوا من المكبس من 3 ل4 صناديق كل صندوق فيه 250 كيس ويوزع على رجالته وهو فى الاخر بيبقي كسب اكثر ضعف الرقم اللى اشتري بيه .
أكثر الدولايب رواجًا للحشيش
أكثر الدولايب اللى عليها ضغط هو دولاب اسمه جامع عمرو بن العاص ده في شارع جنب الجامع على طول مشهور جدًا، والحكومة عارفاه وواقفة على أول الشارع مستنية اللى بيشتري وخارج عشان تقبض عليه، لكن لا تجرؤ تهجم على الدولاب، وهما برضه اللى بيبلغونا لو فى حملة من الداخلية علينا عشان نأمن نفسنا .

أماكن تجمع المعلمين الكبار
جزيرة الدهبهي اللى بيبقى فيها أكبر تجمع للتجار الكبار، أقل تاجر فيهم بيبقى معاه بضاعة "حشيش" فى الأسبوع الواحد بحوالى 200 ألف جنيه، بيوزعهم، وبتبقى منفصلة عن تجارته الأساسية فى المخدرات،
والمنطقة دي مش أى حد يعرف يدخلها هي متأمنة كويس أوى .
الإقبال على الحشيش
الحشيش بيجي بكميات كبيرة وبيتوزع ويخلص ويبقى فى ناس مش لاقية كمان لأن أهم حاجة بقت عند الشاب المصري إنه يشرب السيجارة الصبح "اصطباحة" عشان يعرف يكمل اليوم على الرغم إنه مش من المنبهات !، لكن بيعتقد الشاب أنه بيمدوا بصبر شوية يسكت على اللى بنشوفه فى الشارع وبلاويه!
أماكن استيراد الحشيش
أكبر المناطق اللى بيستورد منها الكبار الحشيش والبانجو "سينا، مرسى مطروح، والإسماعيلية،اللي بيسموها بلد المانجة والبانجو لأن معظم سكانها عرب والعرب دول ممكن يدوك شوالين بانجو مقابل كيس عيش منك، وهناك المانجة بتتزرع جنب البانجو، تيجى تشترى البانجو تلاقيه ريحته مانجه، والنوع ده من البانجو اسمه "مانجاوى"، بس الأزمة بتبقى كيفية المرور على الكمائن

أصناف الحشيش
فى أصناف كتير من الحشيش فى نوع اسمه كف، كف النار، كف اللوتس، بى إم، الشجرة، الهبو، الكف المنقرش، الكافيين .
أسعارهم مختلفة، أغلاهم الكف المنقرش وهو أجودهم، أما الكف اللوتس فيليه في الجودة، والأسماء دى بتبقى نابعة من الأختام اللى بتبقى على الكيس، الكيس بيبقى مختوم مثلًا بكف وجمبه زهرة اللوتس فبيتسمى باسمه وكلهم بيتعملوا فى مكبس واحد لأنها عجينة بتتعمل فى بعضها مع "الحنة"، و"الزيت"!.

•الحياة داخل المكابس
المكبس عبارة عن مصنع كبير متقفل فى جبل فى فيلا لرجل أعمال كبير محدش يعرف عنها حاجة فى صحراء فيها مكان معين، وبيتقسم مربعات على قد الأكياس، وبيبقى موجود كميات من الرول اللى بيتغلف بيها الجبنة فى السوبر ماركت علشان يتغلف بيها الحشيش، وكل واحد معاه ختم معين مخصوص لكل مربع، مفصولين عن بعض، كل مربع حسب نوع الحشيش وخلطاته وعلى الأساس ده بياخد الختم بتاعه .
الإسكندرية هى الراعي الرسمي لمكابس الحشيش من أول الكيلو 21 لحد آخر الإسكندرية خصوصًا في منطقة "أبو تلات".. هناك الحشيش بيتباع علني على عينك يا تاجر، والصباع اللى بنبيعه في القاهرة ب 100 جنيه في الإسكندرية رخيص ب 20 جنيهًا بس مع اختلاف الحشيش المغربي، عن البلدي والفرق بينهم فى الجودة المغربي بيبقى ناشف وكتير لكن البلدى بيبقى طرى وبيعمل دماغ عالية أوى !
الحشيش المضروب والأصلى
الحشيش المضروب دا مش بيبقى خلطة مضروبة لا هى نفس الخلطة بس بيبقى سوء تخزين لو حصل هوجة معينة من الداخلية بيبقى صعب على المعلمين التوزيع فبيخزنوا غلط ولما يرجع يوزع بيكتشف ده لما يروح ياخد كمية كبيرة بتم خلط جزء من اللى اضرب ده داخل الكمية .
متعاطو المنطقة
منطقة كلها بتتعاطى حشيش وبرشام حتى أصبح ربع المنطقة صبيان والباقى متعاطين .
قاعدة الحشيش "لومش قادر تشتريه.. بيعه" عشان كده نص الشعب بيبيع مخدرات وبيشربها برده، البداية مش صعبة الواحد بيقوي قلبه وبعدين يشوف حد يضمنه زي البنك عندالمعلم علشان يسحب بضاعة "بالأجل" ويتاجر فيها ، وبتبقى أي حاجة في وش الضامن.
المخدرات ملهاش سن ، معظم اللى بيشتروا، بقوا طلبة مدارس مش جامعات حتى، ولا بقى ليها مستوى اجتماعي بيحكمها وأكبر الزبائن قد يكون محاسب يشترى لو الحتة ب 100 جنيه يدفع ال200 .
الصبيان ورجال الأمن
مفيش قسم فى مصر مايعرفش أماكن الدولايب لدرجة إن مافيش قسم فى مصر إلا وتلاقي وراه دولاب مخدرات .
المناطق اللى بيبقى قريب منها قسم زى منطقة مصر القديمة كدة بيبقى فيها مرشدين والمرشد منه للأمين الاتنين دول وبعض الضباط الصغيريين بيبقوا مظبطين مع المعلمين، وبيبلغوا بأى دورية أو حملة وساعات بتيجى الحملة تحرز 5 صناديق حشيش و200 ألف جنيه مثلا وتاخدهم ومتقبضش على حد وتمشي !

الهيروين المتصدر المشهد
الهيروين انتشر بطريقة كبيرة مثلًا منطقة زى منطقة دار السلام بقى نصها بيتعاطى، وسعرها نزل من 400 جنيه ل 50 جنيهًا فبقى العيل اللى أول مرة فى حياته يشوف بودرة عاوز يجربها، والمشكلة إنها قوية جدًا من أول مرتين بتحولك مدمن بودرة، وبعدها الحشيش فى أى قسم شرطة هتلاقي 100 مقبوض عليهم منهم 70 متاخد فى بودرة وال 30 حشيش وبرشام .

البرشام مغيبات ومنشطات.
البرشام كتير جدًا وبيتقسم لنوعين:
النوع الأول المغيبات: زى ابتريل، اموتريل، الصراصير، ابو صليبة، المسيحي.. أصلا أدوية بتتوصف للأرق والصرع وغيرها من الأمراض.
المغيبات دى من أهم وظائفها بترخي الأعصاب وبتخلى الواحد هادى جدًا ومبسوط وبيغني كمان .
النوع التانى المنشطات: زي الترامادول وعيلته، الفراولة مثلا.
والمنشطات دى بتدى الواحد قدرة أكبر على الشغل ودائمًا اللى بياخدها أصحاب الحرف الصعبة زى الحدادين والسواقين والشغالين فى المعمار وغيرها والمنشطات دي بتزيد مع زيادة شرب الشاي والقهوة .
البرشام سعره بيختلف حسب النوع يعنى أسعار المنبهات البرشامة الواحدة ب 10 جنيهات والشريط بيعمل 100 جنيه، أما المنشطات فبيبقى السعر أقل بس مش كتير .
كل الأنواع دى من البرشام بتتصرف من الصيدليات بس ومابتتجابش من مكان تاني وفى صيدليات كبيرة بتتعامل مع المعلمين، وبيوردولهم عدد مهول من كل الأنواع وبياخد نسبة على كل 100 شريط .