سامو: دخول المجال الفني صعب

لأن كلمتنا بتهتم بكل جديد.. وبتحترم كل مجهود كبير، النهاردة كلمتنا جايه ومعاها حوار مع موزع موسيقى صغير في السن، ورغم مشواره القصير قدر يحقق إنجازات كتيرة، وقدر يوصل في فترة قصيرة لأكبر الفنانيين، قدر يدخل مجال الموسيقى بموهبته ومش بالواسطة، إزاي قدر يوزع أغنيتين في ألبوم الفنان هاني شاكر الجديد ؟, وإزاي أُتيحَت له فرصة توزيع الموسيقى التصويرية لفيلم أحاسيس ؟, هو ده اللي هنعرفه منه دلوقتي.. هيكون معانا في حوار بسيط الموزع "سامح فؤاد" الشهير ب "سامو" .
بدأت كلامي معاه بطلب بطاقة تعارف عن نفسه؟
إسمي سامح فؤاد "سامو" 27 سنة مواليد برج الاسد, موزع موسيقي و خريج كلية العلوم قسم كيمياء جيولوجي .
إهتمامك بالموسيقى بدأ إمتى؟
بدأ من صغري و أنا في 5 ابتدائي لما اشتركت في فريق الموسيقي، ودخلت كورس تبع المدرسة لتعليم الموسيقي وكنت بلعب علي الأكورديون، ولما دخلت مدرسة الأورمان في ثانوني.. طبعاً أول حاجة عملتها رحت لأوضة الموسيقي واشتركت ولعبت علي الجيتار في فريق المدرسة, وكنت من أحسن 5 عازفين جيتار على مستوي الجمهورية في ثانوي .
أول تجربة لك في مجال الموسيقى كانت إيه؟
أول تجربة لي كمحترف كانت مع المطربة والمخرجة اللبنانية "ملك الناصر" والمطرب السوري "نضال سلطان", إنما قبل كدا عملت موسيقى تصويرية في الجامعة في مسرحيات مهرجان المسرح, وأخدت أحسن موسيقى 3 مرات متتالية من 4 اشتراكات, وموسيقى مسلسل يوميات ستاموني إخراج هشام عطوة .
إزاي قدرت تدخل المجال وتتوغل فيه؟
بصراحة.. دخول المجال ده صعب.. وعشان الواحد يدخل المجال ده لازم حاجتين مهمين جداً, أولاً الموهبة والتميز ثانياً العلاقات, لازم الواحد يكون ليه علاقات كتير عشان يقدر يتوغل في الوسط.. ده بجانب الحظ و توفيق ربنا .
تجربتك مع فيلم أحاسيس جات إزاي؟
تجربتي مع فيلم أحاسيس جات عن طريق أستاذي الملحن خالد البكري, جاله عرض من مخرج الفيلم الأستاذ هاني جرجس فوزي, واشتركت أنا وخالد البكري في عمل الموسيقي التصويرية، وعايز أشكر الشاعر الكبير جمال بخيت إنه إدالي الفرصة دي، والمخرج هاني جرجس فوزي .
هل لازم عشان تعمل موسيقى تصويرية لأى فيلم.. إنك تتفرج عليه الأول ؟
طبعاً.. أنا أصلاً بقعد مع المخرج لما الفيلم يتصور.. وأنا والمخرج بندون الملحوظات, وباخد نسخة من الفيلم عشان أنفذ رؤيتي أنا والمخرج .
ياريت تقولنا قائمة أعمالك من البداية لحد دلوقتي
أغنيتين للفنان هانى شاكر "أحلى الذكريات و كل حاجة"، والموسيقى التصويرية لفيلم أحاسيس، وأغنية للفنان أحمد الديبركي "حد يفهمها"، وأغنية للفنانة إيمان سعد "كان أبويا"، وأغنية للفنان تامر سري "هم دول الرجالة"، وأغنية لشادي بدوي "شوفتها" ودي كانت في ألبوم ميوزيك ناو 5 ، وأغنية لملك الناصر "إنت عارف يعني إيه مصر؟", وأغنية للفنان نضال سلطان "يابا يابا"، والموسيقى التصويرية ليوميات ستمونى, وكمان حصلت على 3 جوائز من المهرجان المسرحي لجامعة القاهرة.
إيه أحلى كومنت جالك من مغني عملتله أغنيته؟
أحلي كومنت..... كان من الفنان هاني شاكر قالي "تسلم الماما اللي جابتك يا سامو"
ايه جديد سامو ؟ عاوزين حاجة حصري لكلمتنا
أغنية "إنتي حلوة" للمغني "واهي", وأغنية "الجو مالُه" للمغنية "ملك الناصر", وأغنية "عشقاك بجنون" ل "أسمرة", وال 3 أغنيات من كلمات هاني الصغير وتلحين خالد البكري, والخبر الإكسكلوسيف إن الفنان هاني شاكر بيصور أغنية أحلى الذكريات حالياً...