لؤة فتحى عبد المنعم: فكر معايا..!

عمرك فكرت تعمل بطاقة انتخابية أكيد لأ .......صدقني ولا أنا كمان في حد سألني قبل كده أنتي ليه عمرك ما فكرتي تعملي بطاقة انتخابية جاوبت بكل بساطة لأني متأكدة أن عمري ما هغير حاجة لسببين اثنين ليس لهما ثالث الأول أن مفيش حد كويس ممكن أنتخبه فى انتخابات مجلس الشعب "وحط تحت مجلس الشعب دى ميه خط ألا تفتكروا حاجة تانية ولا حاجة خلى نيتكوا سليمة" المهم السبب التانى أن حتى لو فى حد كويس وانتخبته مثلا مثلا يعنى بيتحول بقدرة قادر إلى إنسان تانى وممكن نفسر ده مثلا بحب السلطة أوالكرسى يعنى لو كان ليها تفسير.
وبعدين سألتني طيب لو كل واحد فينا قعد يقول "أنا عمري ما هغير" "استحالة أغير" يبقى فعلا عمرنا ما هنغير حاجة وهنفضل مكانا والسبب ساعتها مش هيكون بسبب أن مفيش حد كويس أو أن العيب في الأوضاع اللى حوالينا لأ العيب ساعتها هيكون سلبية مننا ممكن نغير واحنا اللى مش عارفين أو مش عاوزين قلتلها نغير إيه أنتي أكيد بتحلمى قالتلى طيب فكرى فيها بشكل تانى فكرى أنك لازم يكون ليكى بصمة ...بصمة فى التغيير اللى بنحلم بيه حتى لو محستيش بيه التغيير عمره ما هييجى فجأة لازم ياخد وقت ووقت كبير كمان رديت عليها وقولتها ما أنا عارفة مصر عمرها ما هتبقى مصر اللى فى خيالنا قبل 30 سنة قالتلى طيب ما انتى عارفة اهو التغيير اللى كمان 30 سنة عمره ما هيجى فى سنة .
بس لازم نبدأ ....لازم نحاول .....لازم يكون لينا دور حتى لو الدور ده نتيجته مش هتظهر في ساعتها لكن صدقيني على المدى البعيد أكيد هتشوفى التغييراللى انتى بدأتيه ...وقالتلى يا ستى على الأقل نكون ايجابيين اختاري المرشح الكويس وهو وضميره بقى ده حسابه عند ربنا .
بيني وبينكوا مش عارفة فعلا لما فكرت في كلامها قلت طيب على الأقل أقول لربنا إني حاولت إني عملت حاجة إني كنت إيجابية وإني حاولت أغير
ومازالت أفكر وأفكر وأفكر...........ما تيجوا تفكروا معايا