إنتوا بس هتفهموا ... لمروة جمال الدين

يعنى إيه كلمة وجع؟
يعنى لما تشوف صحابك
تترموا ف حضن الكلام
و انتوا دايبين م الآلام
كل واحد بين ملامحه
قصّة و رواية و جروح
كل واحد فيكو حاسس
ب الألم فى كل روح
كل واحد فيكو ساكت
جوّه مِنّه شىء سِمع
أنه الحزن اللى ساكنة
جوّه نظرتكو اللى راسمة
ألف ضحكة و ألف بسمة
و انتوا حاضنين النهار
و ف قلوبكو بسّ نار
و الأمانى مؤجَّلة
و الفَرَح ليه مٌرتَجَع
و امّا تتقابل عينيكو
تشتكوا الوجع اللى فيكو
ب نظرة صامتة بدون دموع
الوجع شىء م الحياة
و الحياة مافهاش رجوع
سكّة ماشية ل بكرة بس
و ف عنيهم راح تحسّ
إنهم زيّك تمام
شلّة عايشين ب الألم
و انتوا بس هتفهموا ...
يعنى إيه كلمة وجع ؟