تغطية ورشة " 3738لايف " في مكتبة عرب المحمدي بالعباسية

اللي مخلي دولة زي الصين دلوقتي من أكبر دول المنتجة و المصدرة في العالم، هو انهم عرفوا كويس أوي قيمة الموارد و المنتجات و الخامات المستهلكة، و من هنا قررنا ان فكرة إعادة التدوير تكون أحد أهم مشروعاتنا في مجموعة 3738لايف،
حلمنا اننا نلف كل بيت في مصر علشان نِعرف الناس ازاى ممكن يحولوا المنتجات المستهلكة اللي بيرموها و مش واخدين بالهم من قيمتها لمنتج مفيد ليهم فى حياتهم اليومية يقدروا يستخدموه أكتر من مرة. أول محطة لينا كانت فى "قصر ثقافة محافظة السويس" في يوم الخميس 28/8/2010 ، حضر الورشة 25 فرد من مختلف الأعمار، عرفنا الناس بالمشروع و فكرة إعادة التدوير و بدأنا تقسيم الناس و طرح فكرة المشروع و هي تحويل علب العصير و الورق الدشت إلي نوتة صغيرة، المحطة التانية كانت في القاهرة بالتحديد في مكتبة عرب المحمدي في العباسية يوم الاثنين 8/11/2010، قسمنا الحضور إلي أربعة مجموعات، بدأنا نناقش أفكار عن كيفية إعادة تدوير المواد المتاحة، و مناقشة أفكار مشروعات تم تنفيذها سابقا، بعدها بدأنا نشتغل علي مشروع الورشة و اللي كان اننا نخلق من الكرتون و الورق و قصاقيص المجلات "محفظة"، تفاعل الحضور و بدأوا في التنفيذ، مستمتعين بموسيقي Happy New 'Ear (أحد مشاريع الاثراء الثقافي في مجموعة 3738لايف
علي مدار ساعتين الورشة، نتاج الورشة كان مجموعة من المحافظ و الشنط الصغيرة بأشكال و أفكار مختلفة، الناس انبسطت إنها عملت حاجه مختلفة عن روتين الحياة اليومي، و أحنا كمان انبسطنا اننا قدرنا نوصلهم فكرة صناعة الشئ من اللاشئ.
جدير بالذكر أن 3738 لايف، هو ببساطة معرض لأعمال مجموعة من الفنانين الشبان في شتي المجالات، يضم المعرض لوحات تشكيلية، أفلام، تصميمات، اعلانات ثابتة و مصورة، و الأهم مشغولات يدوية ذات أفكار جديدة و مختلفة، فى البداية جاءت فكرة المشغولات اليدوية ربما لشغل وقت الفراغ، و التعبير عن الذات، أو ربما للتسلية و الضحك، أو هدايا للأصحاب و الأقارب، حتي جاءت فكرة إنشاء مشروع يهدف إلي نشر الثقافة و الفنون في مصر و الوطن العربي، بدأنا بعرض أعمالنا من المشغولات اليدوية و التصميمات و اللوحات، ثم اتجهنا فيما بعد إلي اثراء ثقافة الاخر عن طريق نشر أغاني و أفلام التراث، و التعريف بفنون العالم، حيث يتم يومياً إرسال رسالة لأعضاء جروب المشروع علي الفيس بوك، و ترشيح أربع أغاني لفنانين من مختلف أنحاء العالم، أيضاً يتم شهريا ترشيح أربعة أفلام و توفير روابط التحميل لمشاهدتها من المنزل علي مدار الشهر، بمعدل فيلم كل أسبوع و مناقشته علي الموقع.
لمعرفة المزيد عن 3738لايف زوروا www.3738life.com