أوان الحصد

وفين الحلم ؟
وفين اللى البشر قاموا
عشان يلاقوه
بشر شِبْعِتْ من الأحزان
وجوه قلوبهم البيضا
هموم لسنين تكفيها
ومرسومة على وشوشهم
شجون الدنيا ومافيها
كإن الناس دى مبتفرحش
ومن كتر العطش ف الأرض
بنروى البذرة مبتطرحش
كإن الوقت من يومها
هباء منثور
كإن الأرض مش راضية
تكون غير بور
كإن الليل
بيحلف إنه مش ماشى
ولا هيسبنى أشوف النور
وكل ما اشبّ
يطول السور
وإيدى لسه مش طايلة
وعجزى أطول
كما العجز اللى لازمنى ف سنين عمرى
وكون الحلم بيعاند يطيع أمرى
بيخلق ميت سؤال فيّا
....
وفين الحلم ؟؟
وفين اللى بشر قاموا عشان يلاقوه ؟
أنا قَدِّمت سبت وحد
أنا زارع
وراح ييجى أوان الحصد