«المصرى اليوم» تنشر مشهد من مسلسل «المزرعة» عن يوميات رموز نظام مبارك فى السجن

بعد أسابيع قليلة يبدأ تصوير مسلسل «المزرعة»، الذى كتب له السيناريو والحوار المؤلف محسن الجلاد ويتعرض فيه لرموز النظام السابق المحبوسين على ذمة قضايا فساد وقتل المتظاهرين أثناء ثورة 25 يناير وتفاصيل حياتهم فى سجن طرة فى إطار فانتازى كوميدى.
وقال المؤلف محسن الجلاد ل«المصرى اليوم»: تعمدت أن يكون التناول الدرامى بشكل خفيف ومؤثر وسياسى فى نفس الوقت حتى تصل المعلومة للمشاهد فى إطار ضاحك، خاصة أن الفترة الماضية شهدت كثيراً من الضغوط والأحداث السياسية الساخنة.
أضاف «الجلاد»: فكرة المسلسل تدور حول رموز النظام الفاسد وليس عن الثورة نفسها والأحداث تبدأ بعد نجاح الثورة وتنحى الرئيس السابق وحبس كبار المسؤولين والوزراء الفاسدين فى طرة، كما يتعرض السيناريو لحبس نجلى مبارك علاء وجمال فى سجن المزرعة أيضا، كما يكشف عن كواليس جناح الرئيس السابق داخل مستشفى شرم الشيخ ومشاكسات أحمد عز مع العادلى، وخبايا صفوت الشريف وفتحى سرور، ومن المواقف الكوميدية بالمسلسل وضع برشام مخدر لزكريا عزمى فى الشاى فيخرج عن وقاره ويزغرد ويرقص إلى جانب زيارة إحدى الفاتنات للمساجين واحدا تلو الآخر حتى نكتشف فى نهاية المسلسل أنها تزوجت عرفيا من كل عناصر الفساد.
وأكد «الجلاد» أنه أثناء التحضير لكتابة المسلسل جمع معلومات كثيرة عما يحدث فى سجن مزرعة طرة، وزار أحد المسؤولين عن السجن، ورصد الكواليس على الطبيعة، موضحا أن الأحداث تعتمد على وقائع ومعلومات ممزوجة بشطحات من خيال المؤلف لتضفى روحا كوميدية.
وأشار إلى أنه تم الحصول على موافقة الرقابة وكان الشرط الوحيد أن يكتب تعهداً بأنه مسؤول قانونيا أمام أى جهة تقوم برفع دعوى قضائية ضد المسلسل، فضلا عن تغيير الأسماء والتى أصبحت كالتالى: جمال وعلاء (كمال وبهاء) نظيف (لطيف) زهير جرانة (زين زعفرانة) حبيب العادلى (منيب الرفدى) أحمد المغربى (محمد الشامى) فتحى سرور (فوزى مسرور) زكريا عزمى (زكى عزام) سوزان مبارك (سهام).
وقال الجلاد: مدة كل حلقة لن تزيد على نصف ساعة، وستنفذ بشكل يوحى كأنها بث يومى مباشر من سجن طرة، كما أن فكرة المزرعة ستتحول إلى فيلم يتم التحضير له حاليا وسيعرض قبل المسلسل لكن لم يتم حتى الآن الاتفاق بشكل نهائى مع مخرج أو أبطال العملين وسيتم تحديدهم خلال الأيام المقبلة وستقوم شركتى الخاصة بالإنتاج مع إحدى القنوات الفضائية.
«المصرى اليوم» تنشر مشهد يجمع المخلوع بزوجته فى المستشفى
وتنفرد «المصرى اليوم» بنشر أحد مشاهد المسلسل الذى يجمع الرئيس السابق بزوجته بحضور زوجتى نجليه فى مستشفى شرم الشيخ.
جناح الرئيس المخلوع بمستشفى شرم الشيخ
حيث الرئيس مضجعا على سريره نصف
ضجعة وحول زوجته سهام وهدى
وفريدة زوجتى ابنيه.. والوجوم يكسو
الوجوه.. والرئيس فى بداية المشهد.
الرئيس: ايه أخبار بهاء وكمال ياسهام؟
الهانم: هايكون إيه بس ياريس.. أهم زى مابيقولوا
خدوهم من الدار للنار يانن عين مامتهم
الرئيس: المحامين اتصلى بيهم وخليهم يروحولهم
ويحضروا معاهم التحقيقات أول بأول
الهانم: حاضر.. بس لازم نشوف حل نوقف بيه المهزله دى
الرئيس: وهى مهزلة بعقل؟! دى بقت مسخرة
أنا!!.. أنا اللى فضلت رئيس الجمهورية واللى
الأرض بتتهز تحت رجليا تلاتين سنه يحصلى
ده كله؟!!.
هدى: بيتهيألى مش ده الوقت المناسب اللى نبكى
فيه على اللبن المسكوب يابابا الريس.. لازم
ندور على حل زى ماما سهام ما قالت
الرئيس: حل إيه اللى هاندور عليه؟! احنا بعد ماكانت الدنيا كلها بين إيدينا مابقيناش نقدر نعمل أى حاجة.. مابيقناش فاعل.. بقينا مفعول به
مفعول به ومفيش قدامه غير إنه يرضى وإن مارضيش برضه لازم يرضى
الهانم: لو كنت سمعت كلامى وبعد قرار التنحى كنا
سافرنا وسبنا البلد ماكانش ده كله حصل
الرئيس: ماكنتش متصور إن اللى بيحصل ده كله ممكن يحصل.. قولت كبيرهم شوية مهاتيه فى الجرايد وآدينا قاعدين معززين مكرمين فى شرم اللى بنحبها بعيد عن أى دوشه.. وبعدين ماتنسوش إن لو كنا عملنا زى زين العابدين
على عمل وهربنا كان زمانهم سلخونه تريقه
ومطلعين علينا عشروميت نكته.. ده غير إن
كانت هاتبقى فيه ملاحقات قانونية ومطالبة
للدولة اللى كنا هنروحها بتسلمنا
الهانم: يعنى عاجبك اللى بيحصل ده ياريس؟!
الرئيس: عاجبنى إزاى بس ياسهام.. وفعلا ياريتنا كنا كتينا وهربنا
فريدة: على فكره يابابى الريس.. الخطاب بتاع
حضرتك الأخير اللى بثته القناة العربية زى ما
سمعت كان مستفز وهو اللى خلاهم يتحركوا
ويحققوا مع حضرتك ومع كمال وبهاء
الرئيس: ماهو كان بشورة المحروس جوزك.. هو
اللى صمم إنى أعمل الخطاب ده.. وبعدين
حتى لو ماكنتش عملته كانوا برضه هيحققوا
معانا وهايؤمروا بحبسنا.. لأن العجلة دارت
بالعكس وماعادش ينفع غير إنها تدور بالعكس
وياريت يافريدة انتى وهدى تسيبونى أنا وماما
سهام عشان عاوز اتكلم معاها فى موضوع
فيرى ايرجنت
ثم تخرج فريدة وهدى
الهانم: خير ياريس
الرئيس: اتصلى بمايكل فى لندن؟ وجيمى
فى سويسرا وإدوارد فى نيويورك واتطمنى انهم
لفلفوا الأرصدة والأصول ودوروهم على
الطريقة اللى قولنا عليها واللى دلك انتى
وكمال عليها خبير الأموال الأمريكى مستر
ويليام ؟
الهانم: حصل ياريس.. وكل حاجة وكل خطوة قال
عليها مستر ويليام حصلت.. ولو فضلوا يدوروا
على الفلوس والأصول مليون سنة استحالة
هايوصلولها
الرئيس: ده شقى عمرنا ياسهام ومش هيبقى موت
وخراب ديار
الهانم: عارف ياريس أنا إيه اللى مجننى وهايطير
بروج مخى كلها؟
الرئيس: خير ياسهام
الهانم: أنا كنت اتطمنت وعملت حسابى
إن كمال هايقعد وها أفضل سيدة مصر الأولى
الرئيس: وأنا كمان كنت اتطمنت وعملت حسابى إنى
خلاص قربت أحقق لكيمو حلمكوا
.. وإن كيمو اللى عمرى ماحرمته من حاجه طلبها منى
ولا حتى وهو صغير حرمته من لعبة كان نفسه فيها
خلاص هحققله حلمه يبقى رئيس جمهورية
الهانم: وأنا كنت هبقى مرات رئيس جمهورية وأم
رئيس جمهورية.. وبعد عمر طويل جدة
رئيس الجمهورية
الرئيس: عارفه إن لولا الحلم ده اللى دخل دماغك
ودخلتيه فى دماغ كيمو ودخلتوه انتوا الاتنين
فى دماغى بيتهيالى ماكانش ده كله حصلنا
وكنت زمانى متبت فى الكرسى زى
ماتبت فيه 30 سنة
الهانم: وهو حلمنا مش حلم مشروع برضه ياريس؟
الرئيس: بس بوظ حاجات كتير أوى .. خلانى أنا
وانتى وكمال كل واحد فينا لامم شلة من
الفاسدين حواليه.. بحجة إن هما دول اللى
فى الوقت المناسب هايوصلوا كمال للحكم
وهما دول اللى هايدخلوا الشعب
فى الجحور لو كان فكر وثار على مخطط
التوريث.. كنا بنحتمى فيهم.. وهما كانوا
فاهمين إن احنا واخدينهم حمايه عشان كدا
طاحوا بالجامد أوى .. وكان هم كل واحد
فيهم إنه ينهب ويكوش وإحنا عارفين وساكتين
علشان لما يجى الوقت المناسب هما دول
اللى هايحموا عرش كمال
الهانم: ماهو كان لازم كمال نحققله حلمه ويبقى
الريس من بعدك ياريس
بقهره الشديد
الرئيس: أهو لابقى ريس من بعدى ولا أنا بقيت ريس
وأدينا كلنا بقينا فى الهوا سوا
الهانم: مالك ياريس؟!!!
الرئيس: زعلان ومقهور أوى انى مابقتش الريس..
وإن الكرسى اتسرق منى وأنا مش واخد
بالى ياسهام