نهلة مصطفى تكتب: والله ما انا ماشي

مش عايزنا نلاقي اللقمه
ماشي
يعدي علينا أيام لا في سكر ولا عيش ولا زيت ف البيت
ماشي
سايبيين الحراميه ينهشوا فينا
وتقولوا هو احنا ايه ف ايدينا
ماشي
سونه وولاده خربوها
وعز واتباعه نهبوها
وعايزنا نسكت
ماشي
عملتوا قانون طواريء
وبقيتوا تاخدوا الاب من وسط ولاده ف عز الليل
ودا معاكم مش فارق
ماشي
بنشرب ميه ملوثه دا إن لقيناها
وتقولوا الامراض دي منين جبناها
ماشي
بتنهبوا ارضي وعرضي
وعايزني اكون انا كدا مرضي
ماشي
خالتونا عشوائيين
وكل بلاد العالم شافتنا همجيين
ماشي
حتي الاعلام ملتوه عري
ايوه يا باشا ما لازم الشباب يكونوا متكيفين
وقال ايه حاطين عليه رقابه
بقي يرضيك الكلام دا يا بابا
ولا انتي يا ماما
لابسه لي الكعب وماشيه تتمختري
فاكره نفسك ع الجنه هتتأخري
طيب كنتي شفتي الاطفال اللي تحت الكباري نايمين
ومن كتر شم الكله بقوا ضايعين
واما حفيدكم مات
جنازه عسكريه
وكام يوم حداد
وتلغرافات دوبلوماسيه
وازرع يا سيدي الشجر
وابني كام جمعيه خيريه
الاطفال احباب الله ماقولناش حاجه
لكن في الآف الاطفال بتموت كل يوم
اما ابوهم يقتلهم من كتر الهموم
او من أغذية مسرطنه دخلتوها البلد مليانه سموم
كل دا حصل وبيحصل وبنقول ماشي
كميات مهوله م الغاز لاسرائيل صدرتوها
اراضي بلدي وبعتوها
وقال ايه المتر بدولار
طيب عاملين علينا هنا ليه حصار
وبردو راضيين وساكتيين وبنقول ماشي
وعشان الشاب يتجوز لازم يبقي مديون
ولو اتأخر وماسددش يبقي مصيره السجون
وقال يعني مسكوا كل حرامية البلد
وهو دا اللي فاضل لاجل مايكمل العدد
ومع ذلك ساكتين وقايلين ماشي
والارمله الغلبانه اللي تقول محتاجه يا جماعه كشك صغير علي ناصية حارتي
وأنا عامله حسابي اني هسيب ولادي ال6 مع جارتي
عايزه اربيهم
ومن الزمن احميهم
لا ماينفعش
طيب ليه يا باشا ايه يمنع
الاوراق ناقصه .. واصلا ايه خلاكي تجيبي ال6
هو انا كنت عارفه اني هجبهم للنكبه
ويعيشوا زمن الحسره
والايادي الواصله
ومع ذلك بتمشي وتمد ايديها وتقول ماشي
بس اللي قبلنا قالوا الظلم بيولد الانفجار
الشاب من دول قال كفايه كدا انا بني آدم مانش حمار
وهنزل التحرير ووالله ما انا ماااااشي