انت عندك ايه؟

مفيش شاب دلوقتي مش بيدور على فرصة عمل مناسبة ليه، ولو لقى الفرصة دي بيبقى محتاج يكون مؤهل ليها عشان ما تروحش منه، ولأن "كلمتنا من الشباب وللشباب" ويهمنا انكم تلاقوا الفرص المناسبة في شغلكم،هنقدم لكم بالتعاون مع خبيرة الموارد البشرية "رشا خليفة"، وصاحبة جروب "نصايح رشا" على الفيس بوك.. كل النصايح اللي انتم محتاجينها، وكمان "رشا" هترد على كل استفساراتكم وهتقول لكم على كل اللي انتم محتاجينه عشان تلاقوا فرص العمل المناسبة، ابعت انت بس واسأل عن اللي انت عايزه على.. shoghlana@kelmetnamag.com
السلام عليكم
ازيك يارشا
انا اسمى محمود وبشتغل فى شركه تامين محاسب بس مش مرتاح نفسى اشتغل اتش ار ومش عارف اعمل ايه او اقدم ازاى..?
انت خريج تجارة .... وعندك خبرة في المحاسبة لكن فجأه عايز تحول HR ؟
طب ليه HR ؟
وهل انت أخدت كورسات في الHR علشان تقدر تقدم؟
يعني انا هعتبر نفسي شركة .... و انت جيت تقدمت لوظيفة HR ايه الأسباب الي هتخليني اشغلك في الوظيفة دي؟
زي دايماً ما بقول ..... يا علم كبير .... يا خبره كبيرة ..!!
انت عندك ايه ...؟
بالشكل دا ... المفروض انك تعمل التالي
1- تقدم علي كورس تتعلم فيه الموارد البشرية .
2- تطلب من الشركة الي انت بتشتغل فيها انك تتنقل لادارة الموارد البشرية لانك بتحب المجال و بتؤهل نفسك لانك تعمل بالمجال دا.
3- لو داخل شركتك مش ههينفع ..... يبقي تدرس المجالي الي انت بتحبة ... وتفضل في وظيفتك علشان الفلوس كمرحلة أولي .
4- بعد ما تنهي دراستك تبتدي تبحث عن موارد بشرية من خلال الاعلانات وشركات التوظيف وانك تبعت بشكل مباشر ...الخ.
افتكر بالشكل دا انت أهلت نفسك للوظيفة الي تتمناها ..... وفي نفس الوقت مخسرتش شغلك الحالي .