" سوق التوفيقية".. خضار وفاكهة "سوبر" تبحث عن زبون

"يا معسل يا بطيخ بس ملكش نصيب"، " 4 جنيه بس يا قوطة"، الليمون الفاخر".. بهذه العبارات وقف بائعو سوق التوفيقية يدللون على بضاعتهم البائرة، على أمل يأتى إليهم الفرج من السماء فى هذه الأيام المفترجة ويهل عليهم الزبائن الذين خفت أقدامهم على السوق الأشهر لبيع الخضار والفاكهة بوسط القاهرة. "الناس مش هتفطر انهارده ولا إيه".. يقولها أحد التجار ساخراً من ركود حركة البيع والشراء فى السوق وهو يهندس الخضروات على طاولاته فى دوائر ومثلثات، فترد عليه ربة المنزل ليلى عبد الفتاح " مفيش فلوس عشان الناس تشترى، لحد يوم 10 فى الشهر مقبضتش أنا ولا جوزى مرتباتنا، ومشترتش ياميش السنة دى". "الحاجة غالية والناس تعبانة" تقولها مبررة، ثم تتذكر بابتسامة " بس جتلى شنطة ياميش من عند ربنا". الطماطم "الفريش" ب 4 جنيهات، والطماطم "التعبانة" ب جنية ونصف فقط، الخيار البلدى ب 4 جنيه وخيار الصوب ب 6 جنيهات، ب 3 جنيهات، كيلو البصل البلدى ب 3 جنية والبصل الأحمر السوبر ب 6 جنيهات.. هذه هى قائمة أسعار الخضروات الأساسية التى لا يخلو منها بيت فى رمضان بحسب تسعيرة تجار سوق التوفيقية بينما تتدرج أسعار الفاكهة من 2جنيه ونصف لكيلو البطيخ وحتى 10 جنيهات لكيلو التفاح والمانجو وصولاً ل12 جنيه سعر كيلو الكريز. متحسراً على أيام الرزق الوفير يقول المعلم صابر عبد العال تاجر الخضار والفاكهة بسوق التوفيقية لل"اليوم السابع"، "زمان كنا بنحضر حاجة رمضان من نص شعبان دلوقتى مفيش سحب زى الأول الناس بتوفر والتجار بيخلوا فلوسهم فى جيبهم بدل ما يرموها فى السوق ويخسروها". متابعا: "الحاجة غالية والناس معذورة بس إحنا كمان معذورين، السواقين بياخدوا 100 جنيه فى النقلة بدل 50 عشان البنزين حتى تجار الشنط اللى بنديها للزبون ببلاش، غلوا سعرها وصل 18 جنيها لكيلو الشنط بعد ما كان ب5 جنيهات!". "الوضع ميرضيش ربنا الناس بطلت تتاجر فى الأسواق وبيتاجروا بالدين وبالدم وإحنا اللى تعبانين فى النص" يقولها الرجل الخمسينى متحسرا على أحواله وأحوال البلد. السوق لم يخل من البلح والياميش لكسر الصيام ولكن بحسب حسام سامى تاجر الياميش "الحالة واقفة ورمضان السنة دى غير كل سنة، الناس لا حاسة بالفرحة ولا بتشترى الياميش".