طريق النور

يا‮ ‬غربتي‮..‬

يا حزن مفروش بالآلام‮.. ‬الهم عمره ما نام‮.. ‬ولا الدموع بتنام‮.. ‬والقلب داق المرار‮.. ‬من قسوة الأيام‮.. ‬ولدي الحبيب تاه في الزحام‮.. ‬خطفوه ديابه ولاد حرام‮.. ‬لا يعرفوا ربنا ولا يعرفوا الإسلام‮.. ‬هو الحق ياناس بييجي بالخطف والنهب والسلب والتهديد والانتقام‮.. ‬أحزاني أقوي من الحقيقة‮.. ‬وإيه يفيد الكلام‮.. ‬دا ضنايا يا اخوانا راح يحمي أرواح‮.. ‬والنواح عمره ما يرجع دمع ساكن في الجراح‮.. ‬وبيبكي من‮ ‬غير آلام‮.‬
الأم دايما هي اللي شايلة الهم‮.. ‬وعيونها تنزف دم‮.. ‬وقلبها علي ولدها كل ساعة في‮ ‬غم‮.. ‬لا عاد بينفع قول‮.. ‬ومنين أجيب القول والحزن يملا الكون‮.. ‬ما يكفي ولا يتلم‮.. ‬بطني اللي شالت‮.. ‬ربت وقالت‮.. ‬زينة شباب الحي‮.. ‬جاي ومعاه الضي‮.. ‬ولما راح يحمي الحدود شاف الجحود ويا القيود‮.. ‬كانوا جنود‮.. ‬زي الأسود‮.. ‬صبحوا‮ ‬غلابة متكتفين بإيدين وصبحنا مش عارفين إن كانوا ولاد الخال واللا ولاد العم‮.‬
ناديت علي الدنيا‮.. ‬وهي شاهدة ع اللي جري لولدي‮.. ‬جاوبتني بعيونها والدمعة علي خدي‮.. ‬يا قلب ما تخبي وقول علي جري من زمان‮.. ‬أيام أبويا وجدي‮.. ‬كنا‮ ‬غلابة ودايما دم الغلابة رخيص لا حد يسأل عليهم‮.. ‬ولا فيه كبير له كلمة بتجيب ولا تودي‮.. ‬وبلدي اللي كانت من زمن ليها هيبة‮.. ‬صابتها لعنة ربنا‮.. ‬وحطت عليها الخيبة‮.. ‬لا عرفة تحمي أرضها ولا عارفة ترجع ولدي‮..‬
ولما شوفته معصوب العينين‮.. ‬صرخت من حسرتي وقهرتي ياضنايا يا نن العين‮.. ‬ما كنا ياناس عايشين‮.. ‬ودموعنا جنب الأنين‮.. ‬والفقر جر السنين‮.. ‬وصبحنا في ذل وطين‮.. ‬وكله باسم الدين‮.. ‬هو يا خلق الدين‮.. ‬قال نخطف المساكين ونهدد الصاحيين‮.. ‬ونرهب النايمين،‮ ‬هما ياعالم مش مسلمين وموحدين‮.. ‬وليهم رب لكل العالمين‮..‬
وتروح الأيام‮.. ‬وتيجي الأيام‮.. ‬وبر مصر شغال في كلام‮.. ‬ورغي فاضي‮.. ‬وكله تمام‮.. ‬ويعدي يوم والتاني‮.. ‬ووداني ما بتسمع‮ ‬غير في كلام‮.. ‬آه يا دموع العين لما تشوفي الخوف ساكن في قلب الجوف ومستني كلمة ترد الروح وتطمن قلبي اللي ما بينام‮.. ‬ونعيش كلنا في سلام‮..‬
زمن المحبة والحنان‮.. ‬راح من زمان‮.. ‬وساب لنا هم السنين‮.. ‬وحزن بالفدان‮.. ‬حتي الضحكة البريئة راحت مع النسيان‮.. ‬زي كل شيء حلو في حياتنا هرسته الأحزان‮.. ‬ضاع الأمان‮.. ‬غاب الحنان‮.. ‬وطل علينا زمن مليان بالغربان‮.. ‬آه ياربيع كداب‮.. ‬الصدق فيك‮ ‬غلبان‮.. ‬والحلم فيك كمشان‮.. ‬كان ناوي يكون كسبان‮.. ‬الكل بقي خسران‮..‬
يا ضهر يا مسنود علي حيطان الزمن‮.. ‬هو احنا مكتوب علينا ندفع للدنيا التمن‮.. ‬ونعيش حياتنا نغزل دموع الصبر‮.. ‬لحد باب القبر‮.. ‬والحزن كاس دوار‮.. ‬داير في ساقية ملهاش قرار‮.. ‬وكأنه ترس في المكن‮..‬
ياقوة الإنسان‮.. ‬ويا ضعفه‮.. ‬يا قسوته‮.. ‬وعطفه‮.. ‬ربك كريم وعليم‮.. ‬هو اللي شايف قهرتي‮.. ‬وحاسس بهمي وبلوتي‮.. ‬سترك يارب في محنتي‮.. ‬وتفك أسر الغلابة‮.. ‬وترد‮ ‬غيبة ضحكتي‮.. ‬وأشوف ضنايا ودنيتي‮.. ‬وبلاش تطّول‮ ‬غربتي‮.‬