زمان كان الاطفال بيحبوا يتشعبطوا في العربية الحنطور وهي ماشيه .. ولما طفل منهم يفشل في الشعبطه زي زمايله كان بيفتن عليهم ويقول كرباج ورا يا اسطي .. رافعا شعار فيها لا اخفيها.. النهارده فيه ناس كتير غاويه شعبطه في ديل النظام الحاكم .. طمعانين في منصب وعشمانين في كرسي .. ناس بيتلونوا كل يوم حسب الموضه.. مع العسكري لابسين بياده ومع الاخوان زبيبه ولحيه زياده.. وكل دول عاوزين كرباج ورا يا اسطي.. عايزين في كل زمن كرباج ورا ياسطي .. كرباج علشان السياسيين المتسلقين اصحاب المبادئ المطاطة زي الاستك واللي بتضيق وتوسع حسب الوضع السياسي.. وكرباج ورا يا اسطي علشان الاعلامي اللي بيغير مواقفه زي ما بيغير قمصانه وفاكر ان الناس بتنسي.. وكرباج ورا يا اسطي لأشباه المشايخ اللي فاكرين ان معاهم صك الجنة وتوكيلات جهنم .. ينعمون بالمغفرة علي هذا ويصبون اللعنات علي هذا. وكرباج ورا يا اسطي للمعارضة اللي مش عارفه توحد كلمتها ومش قادرة تنظم صفوفها .. واتفقوا علي ألا يتفقوا.. وكرباج ورا يا اسطي للمسئول اللي مش عارف انه مسئول وفي كل ازمة يخرج يقول .. انا غير مسئول.. وكرباج ورا ياسطي للجراد الالكتروني اللي استحل الاعراض واحترف التشويه في الناس ليل ونهار.. وكرباج ورا يا اسطي لكل واحد فاكر ان الفلوس بتشتري حضارة وان الشيكات بتصنع تاريخ..