فركش

عندما نادينا بترشيد نفقات الخواجة ماسبيرو وأهله كان أول المنفذين هو أنس الفقى وزير الإعلام الذى أوقف "هوجة" السفريات "العمّال على بطّال" للقيادات والمديرين العموم وغيرهم ..ثم جاء مهرجان الإعلام العربى والذى شهد تجربة "هايله"حيث تم التعامل مع لجان التحكيم العرب بالإنترنت والسى ديهات ..وذلك تنفيذا لمشروع الحكومة الإلكترونية من ناحية وتخفيضا للنفقات من ناحية أخرى.. ويارب عقبال ما الوزير ياخد باله من الدراما والبرامج كمان بالمرة عشان السيمفونية تكمل ..!!
معقولة ياجماعة .. سوزان حسن نزلت بالتليفزيون إلى آخر "بسطه" على السلم بتاع ماسبيرو .. تقوم تمسك الدراما فى مدينة الإنتاج مع إن عمرها مامسكت سكريبت مسلسل.. والله حرام عليكم المشرحة مش ناقصة قٌتله .. واللا معاها كارت توصية ..!
**أخيراً..هدأت نفوس العاملين بقطاع الإنتاج وصوت القاهرة بعد سنوات من الشائعات عن ضمهما معاً رغم أنهم مش عارفين مصيرهم إيه بالظبط ..والواضح أن لجنة الدراما العليا ناوية على حاجة ..إيه هيه الله أعلم ..المهم يلاقوا فلوس يعملوا بيها!!
أيوه كده .. عاد محمود سعد إلى قاعدته "مصر النهارده" فى الوقت المناسب بالظبط .. لأن غيابه أسبوعين جعل الشائعات تطوله بأن هناك خلافاً على الأجر وتجديد العقد ..عموماً ربنا ستر..!!
الممثل الوحيد إللى فرحت عشان ماعملش سينما ولا تليفزيون السنة دى صديقى القديم محمد هنيدى .. لأن الموسم "مشموم" .. جدع ياحماده ..بس ماتطولش الغيبة قوى ..وياريت تسمع كلامى وتغيّر العتبه ..!!
حد فكر يسأل على النجم كمال الشناوى ..ياترى كام واحد ..الله يرحم زمان كان المخرجون والممثلون والمنتجون بيقفوا لا مؤاخذه طوابير عشان يرضى .. إييييييه.. زمن ..!!
الفنان الجميل نبيل الهجرسى -عارفينه- سألنى: بذمتك حد افتكر القدير محمد عوض فى أى مناسبة..؟ قلت له:أبداً ..ولا حد هايفتكره .. ياراجل حد فاضى يدوّر على محمد عوض أو أمين الهنيدى أو عبدالمنعم مدبولى ..أو..أو..أو ..خلينا فى السيكو سيكو ..!!
**على مدى 50 سنة لاشفنا رقة ..وضحكة ..وحلاوة ..وأنوثة ..ودلع .. وشياكة .. وموهبة..شويكار .. صح واللا أنا غلطان ..!!
صفاء أبو السعود:استعراض..ماشى..تمثيل..ماشى..مذيعة o.k ..والأحلى إنك كل مابتكبرى حلاوتك تزيد..اللهم لا حسد..!!
diaadandash@yahoo.com