** كتبت رأيي الشخصي المجرد هنا الأسبوع الماضي عن الدستور وما يجب أن يحدث معه الفترة القادمة.. واليوم أقول إن هذا الموضوع يجب أن تتم دراسته بمنتهي الدقة نظراً لأن الدستور يحتاج تصليحاً وتعديلاً في عدة مواد.. وقبل أن نخوض في الاجراءات هناك أمر في غاية الأهمية لايمكن أن ننساه وهو رأي الشعب وأقصد الشعب اللي بحق وحقيقي مش النخبة والمغيبين والمسحوبين من رقبتهم ومش كل واحد بيكتب كلمتين هرتلة علي السوشيال زفت هانسمع كلامه.. ووفقاً لنص المادة "226" من الدستور أنه لرئيس الجمهورية أو خمسة نواب برلمان طلب تعديل مادة او اكثر في الدستور.. وأنا أعلم أن الغالبية الكاسحة في البرلمان يريدون التغيير وهنا يتبقي قرار رئيس الجمهورية إما بطلب تغيير مواد أو لايطلب.. يبقي كده الموضوع له أكثر من طرف.. الأول الشعب والبرلمان وهمه عاوزين التعديل والثاني الرئيس وده يرجع لقراره.. يبقي نهمد بقي شويتين لحد ما نشوف اللي هايحصل وساعتها نتكلم واللي عاوز يقول يقول.. وعن نفسي سيكون الرأي النهائي للشعب.. والمهم البلد تكمل مشوارها والعجلة اللي دارت مش هاتقف علي رأي شخصية عامة محترمة. ** الله الله علي قضائنا العادل بمعني الكلمة.. لابد أن يتم نشر وتدريس كلمة المستشار محمد شيرين فهمي رئيس محكمة جنايات القاهرة خلال جلسة النطق بالحكم علي المجرم احمد دومة بالسجن المشدد 15سنة وسداد 6ملايين جنيه قيمة ما تم تدميره أثناء مؤامرة يناير.. وللذين يتشدقون بحموم الإنسان والحيوان وللمذيعة التي صنعت منه بطلاً من ورق وللمذيع الخروف اللي في تركيا بتاع "أحمد ونورهان".. أقول: اختشوا علي دمكم.. محاكمة دومة أخدت حقها القانوني بالكامل "37 جلسة".. ويحيا قضاء مصر شامخاً. ** للأسف الشديد.. واضح أن كل مسئول جديد بيشتغل يادوبك أول شهرين وبعدها يلاقي نفسه تحت سيطرة اللوبي القديم لأنه ضعيف مهنياً وتم اختياره بشكل معين.. مثلاً في التليفزيون.. عادت شلة مجدي لاشين أقوي من أيامه وتتحكم في كافة الأمور من أول الشاشة لحد منح المكافآت وتوقيع الجزاءات..والدليل مايحدث في القناة الثانية لما شالوا نهلة عبد العزيز ومعرفوش يجيبوا بدالها وتم تسليم القناة إلي أربعة يديرونها واحد إخواني معروف زي الشمس ولبس الكلابش في قضية برنامج "مصر الأهم"والتاني فاشل من رجالة مجدي لاشين وبيظبط البرامج والثالث مالوش في الشغلانة من زمان بيعمل التصاريح ونائب رئيس التليفزيون بيعمل الماليات.. وواحد طول عمره سكرتير بيجيب الشاي والقهوة ودلوقتي بيحط الخرايط ويختار المذيعات ولسه هانقول كمان..وبعدها تقولولي ليه الإعلام صداع في رأس الدولة ..!! ** طبعاً.. الخطيب يحضر ماتش الأهلي وسموحة ويقعد جنب فرج عامر .. لكن ماينفعش الكابتن يحضر ماتش تاني ويقعد لامؤاخذة جنب حسام البدري وأحمد حسن.. مش كده واللا إيه.. كل واحد ليه وزن وحجم برضه..!! ** هايفضل محمد صلاح رمز السعادة وأيقونة الفرحة للمصريين.. أحسن لاعب في أفريقيا سنتين ورا بعض وتكريم محترم وشياكة في الإمارات ويجيب ضربة جزاء ويجيبها جون في برايتون ويحافظ لليفربول علي صدارة الدوري.. والقهاوي تبقي زحمة ونهتف "صلاااااااااح" والإنجليز يغنوا "Mo Salah"..!! ** فلوس قطر والإرهاب ظهرت علي "أبو تريكة".. بيشغل عصابته في الإعلام والسوشيال زفت يلمعوه وهو إرهابي بحكم قضائي قاطع باتر حاسم.. كنت رايح السنغال تلعب ماتش ومصر مش محتاجة دعمك لأنها عملتك وانت عضيت إيديها يا إرهابي.. وماتتلزقش في محمد صلاح إبن البلد دي الوطني المحترم وخليك مع عشيرتك في "الدوخه".. والمدافن هناك رخيصة..!! ** مهرجان المسرح العربي بالقاهرة شيء مشرف يؤكد أن مصر تظل المنارة والشمعة المضيئة للثقافة العربية. ** عبدالرحمن سيد.. مدير سنترال القلعة.. نموذج محترم للمسئول الذي يرعي مصلحة المواطن وحل مشكلته.. برافو.