كشفت الراقصة فيفي عبده خلال استضافتها ببرنامج "ال 10 مساءً" مع الإعلامي وائل الإبراشي على قناة "دريم" عن العديد من المواقف التي تعرضت لها منذ عملها كراقصة. ومن ضمن هذه المواقف، أنها قامت بإلقاء العلم الإسرائيلي على الأرض ووضعته تحت قدميها أمام مناحم بيجن رئيس الوزراء الإسرائيلي، خلال وصلة رقص لها بفندق "مينا هاوس"، وقالت فيفي: "كنت بشتغل في مينا هاوس في مرة من المرات واكتشفت وجود مناحم بيجن، رئيس وزراء إسرائيل، وأنا برقص، وماسكة الطرحة في إيدي حد رمى عليا العلم الإسرائيلي على أساس إني أمسكه". وتابعت: "رميته على الأرض تحت رجليا وقمت واقفة عليه، ومسكت طرحتي حطيتها على البدلة، وقلت يا "أحلى اسم في الوجود يا مصر" وسبتهم ومشيت، تاني يوم جيت لقيت المكان من أول الأهرامات من بره لحد المينا هاوس مليان ورد والناس بتحتفل بيا بسبب اللي عملته". كما روت فيفي موقفاً آخر تعرضت له في فرنسا وقالت: "كنت مع زوجي في فرنسا والتليفزيون شغال وشفت البنت الفلسطينية بتتخانق مع موشيه ديان، وخارجة آكل كافيار أنا وزوجي وبفتح الأسانسير لقيت موشيه ديان قدامي، فقلت لزوجي أنا مش هبات في الفندق ده، ولن أقيم فيه ليلة واحدة". وتابعت فيفي: "بحب مصر أوى ومقدرش أعيش خارج أراضيها.. البلد دى نعمة، والدنيا والدين وكل البلاد قاعدين فى قلبها.. مصر مفيش زيها وكفاية كلمة إيجيبت، وللأسف الراقصة مدانة مسبقاً والمجتمع يعانى الازدواجية فى التعامل معها، حيث يتهافت الجمهور للتصوير مع الراقصة ثم يهاجمونها ويسخرون منها، عندى فريند كتير أوى من بره مصر ومن جميع أنحاء العالم، ومش كل قط يتقال له يا مشمش ولا كل فار يعرف يختار، فيه ناس فى مهنة الرقص محترمات جداً، وطافحين دم فى شغلهم، وياما رقصت عشان أبسط الناس وافرح قلبهم".
