حملة لمنع تشويه قفزة أحمد السقا ..لصالح المغامر فيليكس!

لا حديث في العالم الآن سوى عن قفزة المغامر النمساوي فيليكس بومجارتنر من حدود الغلاف الجوي من ارتفاع يقارب ال 39 ألف متر، ليهبط إلى الأرض مخترقا جدار الصوت في 5 دقائق تقريبا.
لكن الفيسبوكيين يرون الأمر بشكل مختلف تماما، معلقين علي الواقعة بأحلى قلش جاء من شدة اندهاشهم من مدي تطور و اختلاف الغرب عنا، فهم وصلوا الفضاء و يقفزون منه ونحن مازلنا علي سطح الأرض ننبهر بقفزة أحمد السقا من الشلال - علي حد وصفهم.
وإليكم بعض التعليقات الساخرة من قفزة المغامر فيليكس:
- أول تصريح من فيليكس بعد ما نزل كوكب الارض قادماً من الفضاء .. قال : بعد ما شوفت كميه الألش بتاعت المصريين .. انا راجل عبيط أصلاً إنى نطيت
- معلش سؤال ليه الناس مهتمه اوى كده بفيلكيس مكنتش نطه دى
تيجى ايه دى جنب نطه السقا فى افريكانو وهو بيقول بحبك
ولا جنب نطته فى تيتو من فوق الكوبرى
ولا النطه بتاعتى من فوق السرير من شويه كانت تحفه
- قالو عن قفزة فيليكس :
البرادعي : قفزة فيليكس في الجو قبل الدستور هو منتهى الديكتاتوريه
حمدين صباحي: يجب اعادة الانتخابات بعد القفزة
الثوار : إزاي يقفز فيليكس قبل حق الشهيد ؟!
الإخوان : نحن أول من دعا للقفزة
أحمد شفيق : ايه !
أبو إسماعيل : أنا سعيد إنك قفزت القفزة دي
المعلم صبري نخنوخ : أنا أول واحد وقفت جنبه وعلمته القفز
عمرو مصطفي : النطه دي فوتوشوب
عمرو حمزاوى : هذه القفزه العالية لا تملك أى أيديولوجيه فيزيائية ويترتب على ذلك أنها باطلة لانه لم يدرس القوانين الفيزيائية المؤهلة لمثل هذه القفزة
توفيق عكاشة: وايه يعنى إن عم فيليكس نط من 38 كيلو .. منا وأنا فى الكفر حدانا نطيت 40 كيلوووووووووه .. أى والله
مدحت شلبى : وماشى فيليكس .. يا ولد يا فيليكس وهوبا النطه والبطه والقطه .. يانهاااااااار أبيض
- عشان أنا مصرى أما أشوف نطة فيليكس .. مش هقول على نطة احمد السقا يععععععععععع
- فيليكس وصل الأرض في 5 دقايق، وانا بقالي ساعة ونص في ميكروباص إمبابة ومش عارف أوصل بولاق
- فيليكس بينط من الارتفاع ده كله .. عشان يعملنا قوانين جديدة !!
ميعرفش ان كله بيتبرشم فى الامتحان