الغندور يهاجم شيكابالا "قماص الزمالك أبو 8 مليون جنيه"

شن الاعلامي خالد الغندور هجوما حادا على محمود عبد الرازق شيكابالا نجم نادي الزمالك والذى تسبب غيابه عن تدريبات الفريق مؤخرا بدون إذن فى معاقبة الجهاز الفني له بإبعاده عن رحلة الفريق إلى العاصمة الايفوارية ابيدجان ليحرم الفريق بذلك من جهوده فى مشواره الافريقي.
ففى ظل غياب النجم الأسمر، تأهل الزمالك بشق الأنفس إلى دور ال 16 لدوري أبطال افريقيا بعد الهزيمة مساء أمس أمام افريكا سبور الايفواري بنتيجة 2-1 حيث شفع للفريق الأبيض كونه كان فائزا فى مباراة الذهاب بالقاهرة بهدف نظيف.
وقال الغندور فى برنامجه "الرياضة اليوم" موجها حديثه للاعب: "انت بتدلع على الزمالك وممكن تغيب 3 ايام ومتجيش وزعلان عشان اتغيرت بس هل ممكن تعمل ده لو انت محترف فى الخارج. انت بتعمل ده مع الزمالك لأنه بيستحملك لأنه بيتك والجمهور بيحبك فإنت بتدلع عليهم وهما بيسامحوك ودي مش اول مرة تغيب".
وتابع: "هل انت مقدر يعني ايه احتراف. يعني ايه تقعد 3 ايام متحضرش التمرين هل لو فى اى فريق اوروبي اتغيرت هتقول انا مبتغيرش هل هيستحملوك هناك زي الزمالك لازم تفكر مع نفسك".
وأضاف: "شيكابالا لاعب مهم لأى فريق ولكن لو فضل يتقمص وهو فى الاساس مش فى مستواه المعهود فى المباريات الأخيرة إذا الزمالك يبيعه أفضل ب3 أو 4 مليون يورو ويفكك ب 3 أو 4 لاعبين".
واختتم لاعب الزمالك السابق حديثه قائلا: "قطة اللاعب اللي الزمالك اشتراه ب 500 الف جنيه كان أحد الأسباب فى صعود الزمالك وانت اللي بتاخد 8 ملايين جنيه فى السنة كنت بتتفرج على الماتش فى التلفزيون".