ليلى غفران تنشر صور كليبيها الممنوعين من العرض

قامت الفنان ليلى غفران بنشر صور كليبين "طال غيابك" و"فيها إيه" المهددين بمنع عرضهما على القنوات الغنائية بعد تصاعد الخلافات بين ليلى وزوجها المنتج مراد أبو العينين من جهة، والمخرج جميل جميل المغازي من جهة أخرى.
فقد تقدم جميل بشكوى إلى نقابتي الموسيقيين والسينمائيين وذلك لمنع عرض الكليبين على كل القنوات الموسيقية، وبالفعل قام النقيب مسعد فودة بإصدار قرار بمنع عرض الكليبين على القنوات الموسيقية لحين انتهاء التحقيقات في هذا الصدد.
الازمة بدأت عندما اتهم جميل كلا من ليلى وزوجها ابو العينين، الذي أنتج الكليبين، بالتهجم عليه فى منزله والاستيلاء على الخام الخاص بالكليبين دون ان يردا له باقي مستحقاته.
الا ان ليلى اكدت ان هذا لم يحدث، قائلة: "المشكلة بيني وبين جميل المغازي سببها أنني متعاقدة مع زوجي مراد أبو العينين ومعه شريك في الإنتاج على تصوير الكليبين مقابل إحيائي حفلين في مارينا يستفيدان من دخلهما، ففوجئت بأن جميل حط الشغل عنده في البيت ومعملش ولا حاجة والموضوع ده مابقاش يخصني أنا ده انتقل للمنتجين الذين اتفقت معهم، الشغل خلص في منتصف شهر مارس الماضي ولم يسلمه لي وطبعا الخام لو قعد في درجة حرارة مرتفعة ممكن يبوظ، كل شوية أكلمه وأسأله فين الشغل يا جميل يرد: "معلش الأسبوع الجاي".. جميل فين الشغل؟.. يجيب : "لسه ما خلصتش" وكان بيقفل تليفونه ووصلنا لمرحلة إني لازم أجيب خط تاني عشان أكلمه وساعتها كان بيرد، فحدثت مشادة بيني وبين مراد زوجي باعتباره المنتج خصوصا أنني أنا اللي رشحت جميل، يعني أنا اللي متحملة مسئوليته".
وأضافت ليلى: "أنا شكيت إن في مطربة دفعت له فلوس وطلبت منه انه يركن شغل ليلي غفران وأنا بصراحة كنت متحمسة جدا ومبسوطة أني راجعة بعد غياب، بس بعد كده جالي إحباط لما حسيت إن اللي قدامي عايز يكسرني، ده أنا لحد النهاردة مش عارفة الراجل ده كان بيعمل كده ليه، يمكن عايز ياخد شوية شهرة عشان الدنيا كلها بقت ليلي غفران".
وقالت ليلى: "حقيقة الامر أننا لم نتهجم عليه، لكننا زرناه في البيت عادي، ما هو كل يوم كان بييجي لنا البيت قبل التصوير عادي، رحنا له البيت، وبعد ما وصلنا. أنا نزلت قعدت في العربية وسبت مراد يتكلم معاه وفعلا سلم الخام لمراد، وطبعا اتخضينا لأن الخام مينفعش يقعد كل ده في البيت، فطلعنا نجري علي استوديو تحميض في الهرم وحمضناه وتاني يوم سفرّنا الشغل عملنا له تيليسن وجبناه لكني اكتشفت أن الشغل ناقص فقد سلمنا المغازي كليباً واحداً وهو "طال غيابك" وجزءاً من الكليب التاني، لذلك فانا استعوضت ربنا في الكليب التاني".